अमेरिकाया मेरिल्याण्ड राज्यय् स्वनिगलय् थें हे अमेरिकाय् दयेकूगु कुमारी माजुया रथ सालाः १२ क्वःगु येँयाः पुन्हि (इन्द्र जात्रा) न्यायेके त्यंगु दु । २३ दँ न्ह्यः डीसी महानगर लागाय् नेवाः समुदायया भाषा, संस्कृति व कलायात जागृत व प्रबर्द्धन यायेगु आज्जुं नीस्वंगु द नेवा: अर्गनाइजेशन अफ अमेरिकां उगु लागाय् च्वनाच्वंपिं सकल नेपाःमिपिन्त १२ क्वःगु येँयाः पुन्हि (इन्द्र जात्रा) हनेगु ज्याझ्वलय् ब्वति कायेत इनाप याःगु दु ।
सिक्किम धुंकाः न्हापांखुसी अमेरिकाय् दयेकूगु कुमारीया रथनापं देसं पिने जात्रा न्यायेका वयाच्वंगु एनओएं थुगुसी सेप्टेम्बर २१ शनिबारखुन्हु मेरिल्याण्डय् येँयाः पुन्हि (इन्द्र जात्रा) न्यायेकेत्यंगु दु ।
येँयाः पुन्हिबलय् नेवा: समुदायया परम्परागत समय्बजि पाहांपिन्त ल्हापं मकासे नकेगु ज्या जुइ। आः वइगु महोत्सवय् नेपालय् थें लाखे प्याखं व पुलु किसि प्याखं नं क्यनीगु जूगु दुसा परम्परागत स्थानीय वसः पुनातःपिं कुमारी नं क्यनीगु जूगु दु । जात्रा मेरिल्याण्ड राज्यया ब्ल्याक हिल रिजनल पार्कय् जुइगु जूगु दु । ज्याझ्वः न्हिनसिया १२:०० निसें ५:०० ताः ईतक न्ह्याइ ।
