वंगु ने.सं. ११४५ यंलाथ्वः पन्चमि, बसुबार (भाद्र १२ गते) खुन्हु तःदँ न्ह्यवं निसें संगीत ख्यलय् दुबिना च्वनादीम्ह वरिष्ठ संगीतकःमि, मे हालामि व मेच्वमि रत्न बेहोसी बज्राचार्यया योगदानयात लुमंकाः नेवाः साधना कला केन्द्रया ग्वसालय् यलया ज्यापु प्रज्ञा भवनया हलय् ‘रत्न बेहोसी बज्राचार्य नेपाल रत्न हना याकः सनिल ११४५’ ज्याझ्वः जुल ।
यल महानगर पालिकाया ग्वहालिइ ग्वसाः ग्वःगु उगु ज्याझ्वःया मूपाहां मेयर चिरिबाबु महर्जनजु विशेष हुनिं यानाः ज्याझ्वलय् धाःसा थ्यंका मदी । ग्वसाः खलःया नायः भाजु बागमती भाइ (सुन्दर मान श्रेष्ठ)या नायःसुइ न्ह्याःगु उगु ज्याझ्वलय् नेवाः साधना कला केन्द्रया सल्लाहकार भाजु पौभाः साय्मिं लसकुस न्वचू तयादीगु खःसा नांजाःम्ह मेहालामि जुजुकाजि रन्जित, नेपालभाषाया न्हापांम्ह सिने पत्रकार विजय रत्न असंबरे, संगीतकःमि राजु सिंहया लिसें थीथी मनूतसें थःथःपिनि नुगःखँ तयादीगु खः ।
ज्याझ्वलय् कलाकार आराध्या लक्ष्मी खड्गिं न्ह्याइपुक हुलाप्याखं न्ह्यब्वया दीगु खः । ज्याझ्वलय् संगीतज्ञ रत्न बेहोसी बज्राचार्ययात नेवाः परम्पराकथं खेँय्सगं बियाः वय्कःया ९० दँ क्यंगु जन्मन्हिया लसता नं हंगु खःसा ज्याझ्वःया मू आकर्षण संगीतज्ञ रत्न बेहोसी बज्राचार्यजुयात हनाबना तयाः ‘नेपाल रत्न’ हना द्यछायेगु ज्या जूगु खः । ज्याझ्वलय् साहित्यकार विक्रम भक्त जोशी अले वय्कःया म्ह्याय् निशिता जोशीयात मिस विभा २०२५ कासाय् फस्ट रनर अप सिरपाः त्याकादीगुली विशेष हनापौ अले मेहालामिपिं मिनर्वा देवी शाक्य बज्राचार्य, सानुमैयाँ धौभदेलपिन्त हनापौ लःल्हायेगु ज्या जूगु खःसा थुगु याकः सनिलय् मे हालादीपिं आश्रय रन्जित, तेजवती जोशी, सुनिल चित्रकार, कान्छा प्रजापति, कृष्ण महर्जन, सरस्वती मानन्धर, कृष्ण भक्त श्रेष्ठ, कमला राई, चन्द्र बहादुर तामाङ्ग, सुमन कपाली व निशा देशारपिन्त दसिपौ लःल्हायेगु ज्या जूगु खः ।
