थौंकन्हय् नीजि ब्वनेकुथिइ नेपालभाषा ब्वंका च्वनादीपिं स्यनामिपिन्त झीगु नेवाःभाय् खःकथं अःपुक यइपुक व न्ह्यइपुक ब्वनेच्वयेत माःगु आधारभूत खँ स्यनेकनेगु ज्या वंगु ने.सं. ११४५ चौलागाः खस्थि, सनिबारखुन्हु नेपाल लिपि गुथिया ज्याकुथि, साःननि, त्यःदय् जूगु जुल ।
नीजि ब्वनेकुथिइ ब्वंकावं झाया च्वनादीम्ह भाजु जगदिश श्रेष्ठया लिसें स्यनामिपिनिगु थःगु हे सक्रियताय् भाषासेवी व नेपालभाषा, नेपालसंबत् अभियन्ता पौभाः साय्मिं न्ह्याकादीगु थुगु कक्षाय् येँया थीथी नीजि ब्वनेकुथी ब्वंकावं च्वनादीपिं अथे हे नीम्हेस्यां थुगु ज्याझ्वलय् ब्वति कयादीगु खः ।
थ्यं मथ्यं प्यघौतक न्ह्याःगु उगु कक्षा क्वचायेकाः ब्वति कयादीपिनिपाखें जगदिश श्रेष्ठं कक्षा तसकं सार्थक जूगु व माःकथं लिपा लिपा थुजाःगु कक्षा न्ह्याकावं वनेमाःगु खँ तयादिसें थथे नेवाःभाय् खःकथं च्वयेत माःगु आधारभूत खँ स्यनादीगुली सुभाय् द्यछासे पौभाः साय्मियात मतिनाया चिं तकं द्यछाया दीगु खः । लिपतय् पौभाः साय्मिं थुजाःगु ज्याझ्वःया ग्वसाः ग्वयाः ह्वःता चूलाका दीगुली सुभाय्या लिसें कृतज्ञता नं प्वंकादीगु व थथे झीगु अःपुगु यइपुगु व न्ह्यइपुगु नेवाःभाय् खःकथं ब्वनेच्वये यायेत माःगु आधारभूत खँ स्यनेकने कक्षा न्ह्याम्हस्यां ग्वसाः ग्वःसां थः न्ह्याबलें ग्वाहालि यायेत तयार दुगु धकाः नं नुगःखँ तयादिल ।
