येँ – थौं चौलागाः पारु, सुक्रबार ! यलय् बुंगद्यःया न्हवं जुइत्यंगु दु। बुंगद्यःयात सन्ध्या इलय् लगंख्यलय् च्वंगु दबुली न्हवं यायेत्यंगु दु। दँय्दसं चौलागाः पारुखुन्हु बुंगद्यःया न्हवं याइगु खः ।
थौं न्हवंया निंतिं विशेष पुजा यानाः म्हिगः द्यःया जीवन्यास लिकयाः ब्रम्हक्वनय् तःगु बुंगद्यःया पान्जु विनोद बज्राचार्यं धयादिल। बहनी न्हवं यायेधुंकाः रथ दयेकेत साइत पुजा यायेमाःगु नं चलन दु।
साइत पुजान्ह्यः बुंगद्यःया पान्जुं बाराही समुदाय व यंवा समुदायया नायःपिन्त द्यःयात छाःगु नीप्यपासः जाकि व झिंनिपासः जाकि लिसें धुपाँय् व अबिर बी । थुकथं ब्यूगु जाकि कयाः बाराही व यंवा नायःपिन्सं देगः स्वक्वः चाःहिलेमाःगु चलन दु ।
अथे हे न्हवं यानाः बिज्याकातःम्ह बुंगद्यःयात नं स्वक्वः चाःहिलेधुंकाः रथया हामोकीयात पुज्यायेमाःगु– रथ दयेकेज्याया सिँज्याकःमि नायः दिलकुमार बाराहिं धयादिल। बहनी हाम्वःकी तानाः बुंगद्यःया रथ दयेकेगु ज्या न्ह्याकीगु खः।
आः बाःछि लिपा बुंगद्यःयात रथय् बिज्याकाः रथयात्रा न्ह्याकी।
थुगुसी वइगु ने.सं. ११४३ बछलाथ्वः पारु, सुक्रबार (बैशाख ८ गते)खुन्हु द्यःयात रथय् बिज्याकाः बछलाथ्वः चौथि, सोमबार (११ गते) निसें पूच्वं रथ सालाः जात्रा न्ह्याइ।
