अमेरिकाया भर्जिनिया राज्यय् नं नेपालय् थें बिस्काः जात्रा हंगु दु। ‘ल्याय्म्ह अमेरिका गुथि’या ग्वसालय् वाशिंगटन डिसी लिक्क दुगु भर्जिनिया राज्यया स्टर्लिंग सहरया क्लाउड मूर पार्कय् म्हीग सनिबार नेपालय् थें हे बिस्काः जात्रा हंगु खः।
भर्जिनियाय् बिस्काः जात्रा थगुने निसें हंगु खःसां नं थुगुसी रथ यात्रा व भुयूसिन्हः जात्रालिसें धिमेबाजं, समय्बजि थज्याःगु थी थी सांस्कृतिक ज्याखँ व मस्तय्गु निंतिं विशेष ज्याझ्वः नं यानाः हंगु जुल ।
ज्याझ्वः स्थानीय ईकथं न्हिनय् ३ ताः इलय् न्ह्यानाः बहनी ७ ताः इलय् क्वचाःगु खः ।
अमेरिकाय् सामुदायिक रूपय् बिस्काः जात्रा हंगु संभवत थ्व न्हापांखुसी खः।
जात्राय् डिसी मेट्रो एरियाय् च्वनाच्वंपिं नेवाःतलिसें मेमेपिं यक्व नेपाःमिपिन्सं ब्वति काःगु खः । परम्परागत वसः पुनाः द्यः खः क्वबियाः, धिमेया तालय् प्याखं ल्हुयाः, भुयूसिन्हः ह्वलेगु ज्यां वातावरण जात्रामय जूगु खः ।
हलिंन्यंक च्वनाच्वंपिं नेवाःतय्सं थःगु भाय् , सांस्कृतिक सम्पदाया संरक्षण व प्रबर्द्धन यासें नेपाःयात हलिन्यंक म्हसीकेगु निंतिं दच्छियंक हे थी थी सांस्कृतिक ज्याझ्वः याना वयाच्वंगु दु ।
