येँ – वरिष्ठ आख्यानकार मथुरा साय्मिया न्हूगु ताहाः बाखं सफू ‘चिप निप’या चिखिफ्यनेज्या जूगु दु। वंगु शनिबार ज़ूमपाखें सफूया चिखिफ्यनेज्या जूगु खः। ६५ म्ह मयाक पाहांपिन्सं ब्वति काःगु उगु ज्याझ्वलय् सफूया चिखिफ्यनेज्या बरिष्ठ बाखंच्वमि राजा शाक्यं यानादीगु खः।
ज्याझ्वलय् राजा शाक्य, मथुरा साय्मि लिसें मल्ल के सुन्दर, डा. बालगोपाल श्रेष्ठ, डा रीना तुलाधर, प्रमिला साय्मि, पूर्णकाजी ताम्राकार व राकेश महर्जनं थःथगु नुगःखँ तसें सफूयात कयाः थःथःपिनि बिचाः प्वंकादीगु खः ।
शिकागोय् च्वंच्वना दीम्ह बाखंच्वमि केशरमान ताम्राकारं ज्याझ्वः न्ह्याकादीगु खःसाः सफूया प्रकाशन ताम्राकारया मां हीरा देवी व अबु भिक्षुरत्नया नामं न्यादँ न्ह्यः नीस्वंगु भिक्षु हीरा फाउण्डेशनपाखें जूगु खः। थुगु फउण्डेशनं पूर्णकाजी ताम्राकार, पुष्परत्न तुलाधर, सुगतदास तुलाधर, हितकर वीर सिंह कंसाकार व सुवर्णमान तुलाधरयात भिक्षु हीरा साहित्य सिरपाः नं लःल्हाये धुंकूगु दु।
