ख्वप – ख्वपया दकलय् महत्वपूर्ण सांस्कृतिक सम्पदा बिस्का:जात्रा थनिंनिसें सुरु जुल। सुथय् न्याता:ईपाखे भैल:द्य:या पुजा याना: ख्वपया ऐतिहासिक लिसें सांस्कृतिक महत्व दुगु बिस्का:जात्रा सुरु जूगु ख: ।
खाइसंल्हूया प्यन्हु न्ह्यवंनिसें सुरु जुया: बैशाख ५ गते क्वचाइगु जात्रा ख्वपय् च्याचा व गुन्हुतक झ: झ: धायेक हनी ।
थौं न्हापांगु न्हि भैल:द्य: व भद्रकालीया पुजा याना: न्हिनय् रथ साली । थौं त्वा:त्वालय् भैल:द्य:या पुजा यायेगु, भैल:द्य: व बेतालयात गुथि संस्थानं सरकारी पुजा याना: तलेजुया मूल पुजारीयात खड्ग ल:ल्हायेगु चलन दु। तलेजुया नाइकें भैल:द्य:या रथय् उगु खड्ग यंका: विशेष पुजा यायेधुंका: न्हिनय्निसें न्यातँजा:या भैल:द्य:या देग:न्ह्य:नें रथ सालेगु सुरु जुइ ।
सिँया प्यागोडा शैलिं दयेकात:गु भैल:द्य:या स्वतँजा:या रथय् भैल:द्य:यात बिज्याकीसा घ:मालय् बेतालयात बिज्याका: न्यातँपौ देग: लागां थ:ने व क्व:ने लागाय् द्य:ख: साली । द्य:ख: ग:हिति थ्यंका: थौं न्हापांगु न्हिया जात्रा क्वचायकेगु चलन दु ।
बिस्का: जात्राया मूआकर्षणकथं कया:त:गु य:सिं थनेगु जात्रा वइगु ३० गते जुइत्यंगु दु । चैतया लिपांगु न्हिखुन्हु सनिलय् ख्वपया य:सिंख्यलय् ल्हा:दुगु य:सिं थना: हलिंपता: ब्वयेकी। वयां सर्खुन्हु खाइसंल्हूखुन्हु न्हिनय् य:सिं क्व:थली। ख्वपया हे कुम्हा:त्वालय् नं य:सिं थनेगु चलन दु।
थ्व हे झ्वलय् विस्काः जात्राया निंतिं सुरक्षा व्यवस्था कडा यानातःगु दु । जात्राय् हिंसात्मक घटना व अप्पां कयेकेगु ज्या मजुइमा धकाः थुगुसी सुरक्षा व्यवस्था कडा यानातःगु खः ।
अथे हे, बिस्काः जात्रा शान्तिपूर्ण यायेत म्हिगः सद्भाव र्याली याःगु दु । म्हिगः दत्तात्रय इनाय त्वाः व दूधपाटीइ छक्कलं सुरु जूगु र्याली न्याताप्वल देगः तौमधिइ थ्यंकाः सभाय् परिणत जूगु खः ।
