जःलाखःला देय् भारतया सिक्किमय् च्वंगु राष्ट्रिय भाषा एवं संस्कृति बिद्यालय, गान्ताेकया ब्वनामिपिन्त येँय् लसकुस याःगु दु । विद्यालयया प्रमुख विकास प्रधानया नेतृत्वय् वःपिं नीम्हेसित येँया तजिलजि गुथि, नेपाःपाखें लसकुस याःगु खः ।
लसकुस यायेगु झ्वलय् नेवाः परम्पराकथं तजिलजि गुथि, नेपाःया नायः राजु नापित, न्वकू शान्तकुमार महर्जन, छ्याञ्जे सन्धिर महर्जन, दांभरि तुलसा श्रेष्ठ, दुजःपिं सुनिता महर्जन व प्रनिमा नापितं खादां न्ययेका खेँय्सगं ब्यूगु खः ।
ज्याझ्वलय् जीवित कुमारी संस्कृति संरक्षण, संवर्द्धन नापं प्रचारप्रसार यानाच्वंगु ह्यूमत मिसा पुचःनाप म्हसीका कालबिल याःगु खः । पुचःया नायः मचानानी महर्जनं पदाधिकारीया म्हसीका बिसें पुचलं कुमारी संस्कृति संरक्षणय् यानावयाच्वंगु ज्याझ्वःया बारे जानकारी बियादीगु खः ।
नेपाःया धार्मिक, सांस्कृतिक व ऐतिहासिक सम्पदा नापं नेवाः तजिलजि अध्ययनया निंतिं शैक्षिक भ्रमणय् वःपिन्त लसकुस लिपा गुथिया नायः नापितं नेवाः भ्वय्या बारे जानकारी बियादीगु खः, नापं सकलसित भ्वय् नकूगु खः ।
भ्वय् लिपा विद्यालय प्रमुख प्रधानं तजिलजि गुथि, नेपाः व ह्यूमत मिसा पुचःयात सुभाय् बिसें भ्वय्या जानकारिं ब्वनामिपिन्त तःधंगु उपलब्धि जुइगु धयादिल । वय्कलं नेपाः भ्रमणय् वःपिन्सं न्हापांगु खुसिइ नेवाः भ्वय्या अनुभव याःगु धयादिसें लसता प्वंकादिल । नापं प्रधानं तजिलजि गुथि, नेपाःयात मतिनाया चिं नं लःल्हाना दिल ।
लसकुस यायेगु ज्याझ्वःन्ह्यः ब्वनामिपिन्सं येँया बसन्तपुरय् राजकीय कुमारी दर्शन याःगु खः । न्यान्हुया नेपाः भ्रमणय् वःपिं ब्वनामिपिन्त माःकथंया फुक्क ब्यवस्था यलया ज्यापु समाजं याःगु खः ।
