अमेरिकाया भर्जिनिया राज्यया मनासस शहरय् थ्व हे ने.सं. ११४४ चौलाथ्वः द्वादसि, सनिबार (अप्रिल २०)खुन्हु तःजिक स्वक्वः खुसी बिस्काः जात्रा न्यायेकीगु जूगु दु । ल्याय्म्ह अमेरिका गुथिं ग्वसाः ग्वइगु उगु ज्याझ्वः मनासस शहरया स्प्लाश डाउन वाटर पार्कय् जुइ ।
थ्वयां न्ह्यव नं निक्वः ताःलाक न्यायेके धुंकूगु बिस्काः जात्रा थुगुसी स्वक्वः खुसी न्यायेकेत्यंगु खः । थुगुसी थुगु ज्याझ्वःया निंतिं मेमेगु राज्यपाखें नं ब्वति काइगु आशा यानातःगु दु । सकसितं थुगु ज्याझ्वलय् ब्वति कायेत गुथिं इनाप याःगु दु ।
नेपालय् बैशाखया सँल्हूखुन्हु हनीगु थुगु जात्रा डिसि महानगर लागाया निंतिं तसकं महत्वपूर्ण जुइ । नेपाःमि समुदायतसें तसकं अभिरुचि तयाः थुगु पर्वयात स्वयाच्वंगु दु ।
जात्रा न्हिनय् १२ ताः इलय् सुरु जुयाः सन्ध्याया ५.३० ताः इलय् तक न्ह्याइ । जात्राय् धिमे प्याखं, कुमारी प्याखं, सारंगी फ्यूजन (मिश्रित), सांगीतिक न्ह्यब्वया, पारम्परिक प्याखं लिसेंया मेमेगु ज्याझ्वःत न्ह्यब्वइ । लिसें, जात्रा पर्वय् मस्तय् न्ह्यइपुकेया निंतिं मुखाकृति चित्रकला (फेस पेन्टिङ्ग) व शिल्पकला अले चित्रकला (पेन्टिङ्ग) लिसेंया ज्याझ्वःया ग्वसाः ग्वइगु जूगु दु । थुबलय् समय्बजि, भ्वय् आदि नं दइगु धकाः गुथिया नायः पुस्कर प्रजापतिं धयादिल ।
लिसें थुगु हे ध्वाँचय् दुगु स्क्यानपाखें दर्ता तकं याये फै । विक्रम संवत्या न्हूगु दँलिसें सुरु जुइगु ऐतिहासिक व सांस्कृतिक महत्वं जाःगु बिस्काः जात्रा च्याचा च्यान्हुतक तःजिक नेपाःया ख्वपय् हनीसा थिमिइ नं स्वन्हुतक हनी । जात्रा अप्वः धया थें ख्वपय् व धापासि, तोखा व थिमिइ दँपत्तिं हनीगु पर्व खः ।
