येँ – ज्यापु संस्कृति विकास कोषया छेँया जग स्वनेज्या जूगु दु । स्वांयाः पुन्हिया लसता लाकाः कोषया छेँया जग स्वनेज्या येँया यतखा त्वालय् च्वंगु हँय्पुननिइ सुक्रबार जूगु खः ।
जग स्वनेज्याया झ्वलय् नुगःखँ तयादिसें पुलांम्ह उपप्रधानमन्त्री लिसें संघीय सांसद प्रकाशमान सिंहं यतखा त्वाः थः अबु बूगु थाय् जूगु ल्याखं थःगु भावनात्मक स्वापू दुगु थाय् जूगु खँ कनादिल । वय्कलं नेपाःया संस्कृति सम्पदाया संरक्षण व विकास निर्माणया खँय् राजनीति याये मज्यूगु धासें विकास कोषया भवन दयेकेगु निंतिं थम्हं फुगुचाःगु ग्वाहालि यायेगु बचं बियादिल ।
कोषया नायः मंगलकृष्ण सिंहया नायःसुइ जूगु ज्याझ्वलय् बागमति प्रदेशया पूर्व संस्कृतिमन्त्री लिसें सांसद दिपेन्द्र श्रेष्ठ, ज्यापु महागुथि नेपाःया नायः लोककवि राजभाइ जकःमि, कोषया संस्थापक संस्था नारायण परिवार क्लबया नायः प्रचण्डमान बज्राचार्य, येँ मनपा २४ वडाया नायः विनोद कुमार राजभण्डारीपिन्सं थःथःपिनि नुगःखँ तयादीगु खः।
ज्याझ्वलय् येँ मनपा १२ वडाया नायः बालकृष्ण महर्जन, १८ वडाया नायः न्हुछेकाजी महर्जन, २३ वडाया नायः मचाराजा महर्जनपिन्सं नं ब्वति कयादीगु खः ।
कोषया मूछ्याञ्जे रमेश महर्जनं न्ह्याकूगु ज्याझ्वलय् न्वकू सन्तकुमार महर्जनं सुभाय् द्यछाना दीगु खः ।
