येँय् – थुगुसी येँय् पचलि भैरब आजुया झिंनिदँय् जुइगु खड्गसिद्धि जात्रा जुइत्यंगु दु। थुकिया निंतिं वइगु दिल्लागाः एकादसि, बसुबार (असारया २८ गते)खुन्हु येँया हनुमानध्वाका लाय्कुलिइ ग्वय्दां तइगु जूगु दु।
पचलि भैरब आजुया १२ दँय् जुइगु खड्गजात्रा समितिया छ्याञ्जे भरत मालिं धयादीकथं थुगुसी नं थ्वया न्ह्यः थें खड्गसिद्धि राजप्रतिनिधि खड्गया प्रतीकयात थीकाः क्वचायेकेगु खँ क्वःज्यूगु दु। न्हापा देसय् राजतन्त्रात्मक राज्य व्यवस्था दुबलय् जुजुपाखें जुया वयाच्वंगु खड्गसिद्धि गणतान्त्रिक व्यवस्था वसांनिसें राष्ट्रप्रमुख राष्टपतिपाखें याकेमाःगु धकाः खँ वःसां नं अथे मयासें संस्कृतिया मौलिकता ल्यंका वयाच्वनागु मालीया धापू दु।
थुगुसी १२ दँया जात्रा मोहनीया पचिंमह्रःखुन्हु कौलाथ्वः पन्चमि, बसुबार (कार्तिक २ गते) जुइत्यंगु दु।
