येँ– सच्छि किलोति लुँ तस्करी ज्याय् दुथ्याःगु द्पनय् आःतक १० म्हेसित ज्वंगु दु । छम्ह भारतीय व छम्ह चिनीया नागरिकलिसें झिम्हेसित ज्वंगु खः ।
नेपाल सरकार, राजस्व अनुसन्धान विभागया कथं ज्वंपिं मध्यय् कार्गो व कुरियर सेवा बीपिं कम्पनिया सञ्चालकत नं दु । विभागया महानिर्देशक नवराज ढुंगानां– गुम्हेसिया नामय् लुँ वःगु खः, व हे कम्पनिया सामान थ्वयां न्ह्यः नं हयेगु व यंकेगु ज्याय् सक्रिय जूगु खनेदयेवं उमित ज्वनागु धकाः धयादीगु दु । ज्वंपिं कार्गो व कुरियर सेवा बीपिं कम्पनिया स्वम्ह सञ्चालकया नां धाःसा विभागं पित ब्यूगु मदुनि ।
अवैध लुँ प्रकरणय् ज्वंपिं १० म्ह मध्यय् ६ म्हेसित उच्च अदालत, यलं १० न्हुया म्याद कयाः अनुसन्धान न्ह्याकूगु दु । चिनीया नागरिक लिसें प्यम्हेसित धाःसा थौं म्याद तनेगु ज्या जुइ धकाः विभागं धाःगु दु । थुगु प्रकरणय् चिनीया व भारतीय नागरिक ज्वनेवं चीनंनिसें भारत तकया गिरोह सक्रिय जूगु खँ सी दुगु दु । नेपाःमि गिरोह म्हसीकेत अनुसन्धान जुयाच्वंगु दु । नेपाःमि मू नाइके मालेत अनुसन्धान जुयाच्वंगु धयागु राजस्वया अधिकारिपिनि धापू दु ।
भन्सार विभागं लुँ जाँचपासया झ्वलय् ज्याकःमिपिं दुथ्याःगु खँ व घटनाया खँय् छानवीन यायेत विभागया निर्देशक मानबहादुरया संयोजनय् म्ह दुजः दुथ्याःगु समिति दयेकूगु दु । प्रहरिं नं अनुसन्धानया ज्या न्ह्याकूगु दु । अर्थ मन्त्रालयं विमानस्थल भन्सारया जाँचपास अधिकृत रमेश चन्द व जाँचकि खरिदार कुमार ढकालयात निलम्बन यायेधुंकूगु दु ।
ज्वंगु लुँ धाःसा नेपाल राष्ट्र बैंकया टक्सार विभागय् परीक्षण यानाः राष्ट्र बैंकया धुकुती छ्वःगु दु । भन्सार पास जुयाः पिने थ्यनेत्यंबलय् विभागया टोलिं म्हीग बुधबार बहनी हङकङं हःगु सच्छि किलोति लुँ सिनामङ्गलय् ज्वंगु खः ।
