यल -यल हरिसिद्धिया त्रिशक्ति माजुया २०७८ दंनिसें सुरु जूगु १२ दँया जात्रा वइगु चिल्लागाः पन्चमि, सनिबार (चैत्र १७ गते) क्वचाइकीगु जूगु दु । बसुबार यलय् जूगु पत्रकार मुंज्याय् वइगु सनिबार फूच्व माजुया दर्शन व गोदावरि मेला हनाः १२ दँया जात्रा क्वचायेकेगु जानकारि ब्यूगु खः ।
वइगु सनिबार सुथय् ४ ताः इलय् हरिसिद्धि माजुया देगःपिने मुनाः हरिसिद्धिया पुजारिपिं पाखें पुजाज्वलं, काहाः बाजं, धिमे बाजंया लिसें सकल भक्तजनपिन्सं क्वपुलि गुधाःहिति देगलय् पुजा यानाः फूच्वय् वनाः फूच्व माजुया पुजा यानाः गोदावरि जलद्यः ख्यलय् झासु लनाः प्रसाद कायेधुंकाः हरिसिद्धिपाखे स्वयाः १२ दँया सिद्धि दनेगु ज्या औपचारिककथं क्वचायेकीगु जानकारि पत्रकार मुंज्याय् ब्यूगु खः ।
पत्रकार मुंज्याय् यल महानगर पालिका वडा ल्याः २८ या नायः गणेश कुमार महर्जनं १२ दँया मेला क्वचाइगु प्रक्रियाया खँय् जानकारि बियादीगु खः । पत्रकारतय्सं न्यगु न्ह्यसःया लिसः च्याभु धनबहादुर महर्जनं बियादिगु खः।
हरिसिद्धि जात्राया इतिहासयात स्वयेबलय् किम्बदन्तिकथं अथे हे २००० दँति न्हापा भारत, उज्जनया चक्रवर्ती जुजु विक्रमादित्य नेपाः वःगु इलय् थःपिनि कूलदेविया कथं हरिसिद्धि माजुयात कलशय् साधना यानाः बानेश्वरया निलतारा धयागु थासय् पलिस्था यानाः हरिसिद्धि प्याखं न्ह्याकूगु खः । लिपा थी थी हुनिं उगु प्याखं द्यगु खः ।
लिपा लिच्छवि कालय् जुजु नरेन्द्र देवया काय् वरदेवं आःया देवियात हरिसिद्धिइ हानं पलिस्था यानाः प्याखं न्ह्याकूगु खः । व नं लिपा वनाः दिनावन । लिपा जुजु अमर मल्लया इलय् हरिसिद्धि माजु फूच्वय् उत्पति जुल अले नांजाःम्ह तान्त्रिक गयो जुजुं फूच्वं कलश साधना यानाः देवियात हरिसिद्धिइ पलिस्था यानाः पुजारितय्त तालिम बियाः प्याखं हानं न्ह्याकल । लिपा येँया जुजु प्रताप मल्लं प्याखं ब्यवस्थित यायेगु निंतिं नीति नियम दयेकाः प्रत्येक १२ दँय् सिद्धि दनेगु पर्वया कथं न्ह्याकल ।
सिद्धि दनेगुया दुने १२ दँया ई दुने मदुपिं पुजारिया थासय् न्हूम्ह पुजारि भर्ना यायेगु, देगः ल्ह्वनेगु, मुकुट भिंकेगु व न्हूगु दयेकेगु, न्हूगु वसः सुइगु, पुजारिपिनि दथुइ ज्याया भाला इनाः भाला लःल्हायेगु, प्याखंया तालिम बीगु, शक्ति मुंकेगु, दीक्षा बीगु, न्हूगु कलश पलिस्था यायेगु धौख्यः, दोलखा, पशुपति, पन्ति लिसेंया नेपाल मण्डलया थी थी थासय् प्याखं क्यनेगु लिसेंया धार्मिक ज्याखँत याइ । लिपांगु ज्याकथं फूच्व माजुया दर्शन यानाः क्वचायेकी ।
प्रत्येक दँ हरिसिद्धि माजुया प्याखं यःमरि पुन्हि, फागु पुन्हिखुन्हु न्हिच्छियंक हुइकीसा म्वहनीबलय् नं छक्वः क्यनी । थुगु प्याखनय् १० म्ह च्याभु पुजारि व १९ म्ह गण पुजारि यानाः ब्याक्क २९ म्ह पुजारित दुथ्याइ ।
१२ दँया जात्रा न्ह्याकेगु निंतिं १० म्ह च्याभु पुजारियात सरकारि स्तरं हे ब्यवस्थापकया कथं नियुक्त यानाः ज्याया भाला बीगु याइ अले च्याभु पुजारिं मेमेपिं पुजारि नियुक्त याइ ।
