येँ -भाषासेवी, शिक्षाविद्, नेपाल संबत न्हूदँ राष्ट्रिय समारोह समितिया सचिवालय दुजः इ. देवदास मानन्धरया लुमन्तिइ जूमय् ज्याझ्वः जूगु दु । अमेरिकाय् च्वनाः न्ह्याका वयाच्वंगु श्रष्टा साँझ व लक्ष्मीदास मानन्धर लुमन्ति पुचःया ग्वसालय् म्हिगः सनिबार जूम ज्याझ्वः जूगु खः ।
ज्याझ्वलय् न्ववासें नेवाः न्ह्यलुवाः मल्ल के सुन्दरं मदुम्ह देवदास मानन्धर नेवाः ख्यलय् यक्व कथंया ज्या यानाः नं जस मकाइम्ह व्यक्तित्व जूगु खँ कनादीगु दु । वय्कलं थौंकन्हय्या न्हूपुस्ता चिचीधंगु ज्या यात धाःसां जस कायेगु नितिं दकलय् न्ह्यःने वइगु प्रवृत्ति जुयाच्वंगु खँयात न्ह्यथना दिसें देवदास सुनां हे मसीक थः सतीपिं पासापिंनाप च्वनाः दं दं थःगु हे क्वथाय् भाषा, लिपि, संस्कृति लिसें थी थी नेवाः ख्यःया निंतिं यायेमाःगु ज्या याइम्ह व्यक्तित्व जूगु खँ कनादीगु दु ।
ज्याझ्वलय् संस्कृतिविद् डा. त्रिरत्न मानन्धरं देवदास बहुआयामिक व्यक्तित्व जूगु खँ कनादिसें वय्कः देवदासं नेपाल संवतया नगुमाः (क्यालेण्डर) व्यवहारय् छ्यलेफुगु कथंया पिथनेगु ज्या याःगु खँ लुमंका दिल ।
अथे हे, ज्याझ्वलय् जनकवि दुर्गालाल श्रेष्ठ, भिक्षु कोडण्य महास्थविर, पूर्वमन्त्री जीवनराम श्रेष्ठ, वर्ल्ड नेवाः अर्गनाइजेशनया नायः संयुक्त श्रेष्ठ, श्रष्टा साँझ अमेरिकाया कजि प्रभात दीक्षित, भाषासेवी विष्णु चित्रकार, मंगल कृष्ण महर्जन लिसेंया मनूतय्सं न्ववानादीगु खः।
ज्याझ्वः कवयित्री प्रतिसरा साय्मि व पत्रकार सिल्भिया राजोपाध्यायं न्ह्याकादीगु खः ।
ज्याझ्वलय् ब्वति काःपिं सकलसितं छेँजःपाखें देवदास मानन्धरया जहान सरोज मानन्धर व किजा नारायणदास मानन्धरं सुभाय् द्यछाना दीगु खः ।
देवदास मानन्धर लुमंकाः लय् पतिकं थुकथंया ज्याझ्वः यायेगु तयारी ग्वसाः खलकं याःगु दु । इ. देवदास मानन्धर वंगु स्वलान्ह्यः ब्रेन हेमरेजया वासः यायेगु झ्वलय् ७५ दँया बैंसय् मदुगु खः । वय्कः नांजाःम्ह भाषासेवी, उद्योगपति, धर्मसेवी, राजनीतिज्ञ लक्ष्मीदास मानन्धरया तःधिकःम्ह काय् जुयादी।
