नेवाः अर्गनाइजेशन अफ अमेरिका, सियाटल कचाया ग्वसालय् थुगु वाःनिसें नेपालभाषा स्यनेगु कक्षा न्ह्याःगु दु । नेवाःभाय् मसःपिं नेवाः, नेवाः मखुपिं व अमेरिकनतसें थुगु कक्षाय् ब्वति कयाच्वंगु दु ।
शिकागोय् च्वंच्वनादीम्ह नेपालभाषाया बाखंच्वमि, लिसें हलिं नेवाः दबूया साहित्यिक एम्बेसदर व हलिं नेवाः दबू, अमेरिका कचाया सिनियर भाइस प्रेसिडेन्ट केशरमान ताम्राकारपाखें जूम प्रविधि छ्यलाः सोमबारपत्तिं वालय् छन्हु बहनी ६ ताःनिसें ७ ताः ईतक न्ह्याका च्वनादीगु दु । वय्कः भाजु केशर मान ताम्राकारपाखें सन् २०२० निसें अमेरिकाया थीथी राज्यय् च्वनाच्वंपिं नेवाःभाय् ल्हाये सयेके न्ह्याःपिन्त थुकथंया कक्षा कया च्वनादीगु खः ।
आःतक नेवाः अर्गनाइजेशन अफ अमेरिका, फ्लोरिका कचा, नेवाः अर्गनाइजेशन अफ न्यूइङ्गलाय्न्ड, बोस्टन व हलिं नेवाः दबू, अमेरिका कचाया ग्वसालय् दँय्दँसं थथे हे नेपालभाषाया कक्षा न्ह्याका च्वनादीगु दु । आःतक खुदँनिसें सुइनिदँ तकया ब्वनामिपिन्त नेपालभाषा स्यनादी धुंकुगु खँ सीदुगु दु ।
