निदँ न्ह्य:, ने सं ११४२ स अमेरिकाया न्यूयोर्कय् जूगु प्यक्व:गु हलिं नेवा: त:मुंज्या’ दुने हलिंन्यंकया नेवा:तय्गु त:धंगु सञ्जाल – ‘हलिं नेवा: दबू’ यागु देसविदेसं प्रतिनिधित्व दुगु न्हूगु ज्यासना पुच: निर्वाचित जूगु ख: । उगु त:मुंज्याया झ्वलय् संस्थाया संरचनाय् हयेमा:गु सकारात्मक ह्यूपा:या निंतिं व:गु प्रस्तावयात सम्बोधन यायेगु झ्वलय् भाजु संयुक्त श्रेष्ठया नाय:सुइ गठन जूगु न्हूगु ज्यासना पुचलं बचं ब्यूगु ख:। पुचलं ने सं ११४३ सिल्लाथ्व: सप्तमि, सनिबारकुन्हु न्यूजिल्याण्डया न्वकू भाजु कमल प्रसाद श्रेष्ठया कजिसुइ छगू विधान संशोधन मण्डल नीस्वंगु ख: ।
डा बाल गोपाल श्रेष्ठ (नेदरल्याण्ड), भाजुपिं सिजन श्रेष्ठ, दया रत्न शाक्य, दीपक डंगोल व प्रमेश श्रेष्ठ (अमेरिका), भाजुपिं कृष्ण चंखु व संयुक्त श्रेष्ठ (बेलायत), डा शोभित शाक्य (एस्टोनिया), भाजु बीरेन्द्र नकःमि (यु ए ई), भाजु कुमार नापित (जर्मनी), लिसें भाजुपिं शाक्य सुरेन व सुरेन्द्र भक्त श्रेष्ठ (नेपा:) दुज: जुयादीगु थुगु पुचलं निदँ लिपा प्रस्ताव त:गु संशोधित विधान वंगु ने सं ११४५ थिंलागा: सप्तमि, आइतबारकुन्हु अत्याधिक मतं पारित जूगु खँ दबुलिं थ:गु आधिकारिक प्रेस पिथनापाखें सार्वजनिक या:गु दु ।
“हलिंन्यंकया थीथी कचाया सशक्तिकरण व संरक्षक मण्डलया प्रावधान हे थुगु वैधानिक ह्यूपा:या पाखें दबू लिसेलिसें नेवा: समुदाययात नं जूगु मू उपलब्धि ख:।”, दबूया मूछ्याञ्जे डा शोभित शाक्यं धयादिल।
अथे हे दबूया नाय: भाजु संयुक्त श्रेष्ठं धयादिल – “छु ई न्ह्य: संरक्षक स्तरय् हयेमा:गु परिवर्तन लिपा आ: व:गु न्हूगु वैधानिक प्रावधानपाखें थीथी ९ म्ह हनेबह:पिं व्यक्तित्वपिन्त संरक्षक मण्डलय् दुथ्या:गु धइगु हलिं नेवा: दबुलिइ न्हूगु युगया आरम्भ जूगु ख:। थुकिं नेवा: एकतायात सशक्त यासें नेवा: समुदाययागु हकहित सुरक्षित यायेगु संघर्षय् सकसित छधी छपँ जुया: न्ह्या:वनेगु वातावरण दयेकाब्यूगु दु।”
“इतिहासय् दकलय् न्हापांगु खुसी हलिंन्यंकया नेवा:तय्सं प्रजातान्त्रिक पद्धति छ्यला: छगू तसकं सकारात्कम पलाड्ड न्ह्या:गु जिं वा: चायेका:।”, नाय: श्रेष्ठं धयादिल।
दबूया आधिकारिक प्रेस पिथना थुकथं दु
