येँ – खुक्वःगु हलिं नेवाः न्हिया झ्वलय् जूगु च्वकिपा धें धें बल्लाः कासाय् उत्कृष्ट जूपिं ब्वनामिपिन्त सिरपाः लःल्हाःगु दु। सोमवाः येँया जगत सुन्दर ब्वनेकुथिइ जूगु ज्याझ्वलय् सिरपाःलिसें हनापौ लःल्हाःगु खः ।
हलिं नेवाः दबू, नेपाः कवःया नायः सुरेन्द्र भक्त श्रेष्ठया मुंज्या नायःसुइ जूगु ज्याझ्वलय् न्हूजः गुथिया नायः सूर बहादुर श्रेष्ठं सिरपाःलिसें हनापौ लःल्हाना दीगु खः ।
ज्याझ्वलय् हलिं नेवाः दबू, नेपाः कवःया नायः सुरेन्द्र भक्त श्रेष्ठ, न्हूजः गुथिया नायः सुर बहादुर श्रेष्ठ, हलिं नेवाः दबूया केन्द्रीय मूछ्याञ्जे सोभित शाक्य, लोककवि राजभाइ जकःमि, नेपाः च्याप्टरया निवर्तमान नायः शाक्य सुरेन, च्वकिपा धें धें बल्लाःया निर्णायकलिसें चित्रकार चन्दा श्रेष्ठ, जगत सुन्दर ब्वनेकुथिया प्रधानाध्यापक सुनिता मानन्धरं च्वकिपा धें धें बल्लाःया उपादेयताया खँय् थःथःपिनि बिचाः प्वंकादीगु खः ।
च्वकिपा धें धें बल्लाः कासाय् जगत सुन्दर ब्वनेकुथिया युकेजिंनिसें झिगू तगिं तकया ब्वनामिपिन्सं ब्वति काःगु खः । ज्याझ्वलय् नेवाः तजिलजिया विषयवस्तुयात कःघानाः च्वयातःगु ८५ च्वकिपा ब्वयातःगु खःसा ज्याझ्वः नेपाः कवःया न्वकू रमेशमान मुनिकारं न्ह्याकादीगु खः।
