यें – झी कविकेशरी चित्तधर हृदयया ११७ क्वःगु बुन्हिया झ्वलय् नेपालभाषा परिषदं श्रद्धाञ्जलि ज्याझ्वः याःगु दु। सोमबाः सुथय् वय्कःया कालिमातिइ प्यकालय् पलिस्था यानातःगु झ्वाताय् श्रद्धाञ्जलि द्यछायेगु ज्या जूगु खः।
ज्याझ्वलय् नेपालभाषा परिषदया छ्याञ्जे पुष्परत्न तुलाधर, नेवाः देय् दबूया नायः पवित्र बज्राचार्य, नेपाल प्रज्ञा प्रतिस्ठानया पूर्व दुजः लक्ष्मी माली, कवियत्री प्रतिसरा साय्मि, परिषदया दांभरिं मंगला कारंजितं वय्कःया योगदानयात कयाः कुलादीगु खः ।
अथे हे लोककवि राजभाइ जकःमिं कवि हृदययात लुमंकाः च्वयादीगु चिनाखँ नं ब्वनादीगु खः । ज्याझ्वलय् नेपालभाषा साहित्यकार, भाषासेवी लगायतया उपस्थिति दुगु खःसा उपस्थित फुक्कसिनं कविकेशरी चित्तधर हृदयया झ्वाताय् स्वां द्यछाःगु खः ।
नेपालभाषा साहित्ययात धात्थें हे तन, मन व धनं सेवा यानादीम्ह कवि चित्तधर हृदयया जन्म ने.सं. १०२६ बछलागाः ११ खुन्हु येँय् न्यतय् जूगु ख:। वय्कलं जिवंकाछि जक मखु मदये धुंका: तकं नेपालभाषाया हे सेवा यानावन। म्वात्तलें कविता, मे, खण्डकाव्य, महाकाव्य, बाखं, छधा:प्याखं, प्याखं, निबन्ध, व्याकरण, अनुवाद लिसें समालोचनाय् नं च्वसा न्ह्याकादीम्ह चित्तधरं थ: मदये धुंका: थ:गु छेँ नं नेपालभाषा परिषदयात लःल्हाना थकल ।
राणाकालय् जेलय् ला:बलय् च्वयादीगु ‘सुगत सौरभ’यात वय्कलं थ: काय् व ‘मिं मन:पौ’यात थ: म्ह्याय् भा:पिया दीगु खः । थम्हं साहित्य रचना याना: मेपिन्त नं च्वयेगु हःपाः बिया: थम्हं हे सफू-पत्रिका पिथना: थम्हं हे इनेगु तकं यानादीम्ह चित्तधर हृदयं ने.सं. १०७१ दँय् नेपालभाषा परिषद नीस्वना दीगु खः । वय्कः ने.सं. ११०२ तछलागाः तृतियाखुन्हु मदुगु खः।
