येँ– हलिंन्यंक च्वंपिं नेवाःतय्त छप्पँ छधी यायेतु तातुनाः पलिस्था जूगु वर्ल्ड नेवाः अर्गनाइजेशनं (डब्ल्यूएनओ) थःपिनिगु १२ क्वःगु पलिस्था न्हि हंगु दु । पलिस्था न्हिया लसताय् ‘डब्ल्यूएनओया भविष्य व हलिंन्यंक दुगु संघसंंस्थाया आःया भूमिका’ विषयस अन्तरक्रिया ज्याझ्वः यासे डब्ल्यूएनओपाखें न्हापा याःगु ज्यायात समिक्षा यानाः भविष्यया योजनात न्ह्यब्वःगु दु ।
जूमपाखें म्हिगः कौलागाः चौथि, बुधबार जूगु उगु ज्याझ्वलय् संरक्षक दयारत्न शाक्य, पलिस्था नायः डा. बालगोपाल श्रेष्ठ, पुलांम्ह नायः सिजन श्रेष्ठ, नायः संयुक्त श्रेष्ठ, पलिस्था न्वकू कृष्ण चखुं, न्वकू सुरेन शाक्य, मेम्ह न्वकू रजनी प्रधान, सल्लाहकार लोचन मानन्धर, दांभरिं दीपक डंगोल, केन्द्रीय दुजः डा. नरेश मान शाक्य, नेपाः च्याप्टरया नायः सुरेन्द्र भक्त श्रेष्ठ, जर्मन च्याप्टरया नायः कुमार नापित, साहित्यिक एम्बेसेडर लोककवि राजभाइ जकःमि, नेवाः देय् दबूया नायः पवित्र बज्राचार्य, नेवाः अर्गनाइजेशन अफ अमेरिकाया नायः महिन्द्र प्रधान, नेवाः नखः न्यूयोर्कया सल्लाहकार विष्णुमान प्रधान, पासा पुचः गुथि यूकेया पलिस्था मूछ्यान्जे शशिधर मानन्धर, गुगल ट्रान्सलेट प्रोजेक्टया दुजः विद्या दली, मेम्ह दुजः द्वारिका राजभण्डारी लिसेंया मनूतय्सं डब्ल्यूएनओया ज्याखँयात कुलादिसे छ्याता व भिन्तुना नं बियादीगु खः ।
ज्याझ्वः डब्ल्यूएनओ डेलि प्रोडकास्टया सन्चालक सिल्भिया राजोपाध्याय व मिडिया एम्बेसेडर विगेन तुलाधरं न्ह्याकादीगु खः ।
डब्ल्यूएनओ विधिवतकथं पलिस्था यायेगुया निंतिं सन् २०१० य् आःया संरक्षक दयारत्न शाक्यया संयोजकत्वय् तदर्थ समिति नीस्वंगु व सन २०११ य् लन्डनय् जूगु न्हापांगु तःमुंज्यां डा. बालगोपाल श्रेष्ठयात नायः ल्ययाः नोभेम्बर १ तारिखखुन्हु डब्ल्यूएनओ औपचारिककथं पलिस्था जूगु घोषणा याःगु खः । व हे न्हिया लुमन्ती डब्ल्यूएनओं थःपिनि पलिस्था न्हि हना वयाच्वंगु दु । आःतक लन्डनधुंकाः अमेरिकाया बाल्टिमोर, नेपाः व न्यूयोर्कय् तःमुंज्या जुइधुंकूगु दुसा उगु तःमुंज्यां सिजन श्रेष्ठ व संयुक्त श्रेष्ठयात नायलय् ल्यःगु खः । अथे हे सन् २०१७ य् क्यानडाय् प्रादेशिक तःमुंज्या नं जूगु खः ।
सन् २०१४ जनवरी २७ य् अमेरिकाया बाल्टिमोरय् दर्ता जूगु डब्ल्यूएनओं थौंकन्हय् नेपालभाषायात गुगल ट्रान्सलेटय् दुथ्याकेत गुगल ट्रान्सलेट प्रोजेक्ट, डब्ल्यूडिबि, मस्तय् दथुइ न्ह्यसःलिसः कासा लिसेंया ज्याखँत न्ह्याकावं वयाच्वंगु दु ।
अथे हे डब्ल्यूएनओया इनापकथं दँपत्तिं मार्च लाया लिपांगु सनिबार हलिं नेवाः न्हि नं हना वयाच्वंगु दु ।
h 108.111
108.111
1156.792
