येँ– पत्रकार मय्जु सिल्भिया राजोपाध्याययात वाङ्गमय शताब्दि पुरुष सत्यमोहन जोशी स्मृति पत्रकारिता पुरस्कार बियाः हंगु दु । नेवाः पत्रकार राष्ट्रिय दबूया वंगु सिल्लाथ्वः अस्तमि, सनिबारखुन्हु येँ, बिज्यासःया नेपालभाषा मंकाः खलःया दबुली जूगु १२ क्वःगु तःमुंज्याय् बागमति प्रदेशया उद्योग वाणिज्य, भूमि व प्रशासन मन्त्री रामकृष्ण चित्रकारं वय्कःयात सिरपाः लःल्हाना दीगु खः । न्यूज नेपाः डट कमया सम्पादक अले उज्यालो रेडियो नेटवर्क व नेपालमण्डल टेलिभिजनलिसे स्वाना च्वनादीम्ह वय्कःयात २८ दँ ताःहाकःगु रेडियो पत्रकारितायात च्वछासे दबुलिं सिरपाः लःल्हाःगु खः ।
ज्याझ्वलय् भिक्षु कुमार काश्यप स्मृति पत्रकारिता पुरस्कार मेट्रो एफएमय् ज्या यानादीम्ह उदेन न्हूसाय्मियात, ज्ञानदेवी-मणि पत्रकारिता स्मृति पत्रकारिता पुरस्कार रामेछापया पत्रकार युवराज श्रेष्ठयात, ज्ञानज्योति-लक्ष्मीप्रभा स्मृति पत्रकारिता पुरस्कार माउन्टेन टेलिभिजनया नेपालभाषा समाचार डेस्कया प्रमुख विश्वन्तर शाक्ययात, बाबुराजा ज्यापु फोटोपत्रकारिता पुरस्कार फोटो पत्रकार बुद्धशरण शाहीयात व श्रीराम स्मृति पत्रकारिता पुरस्कार ख्वपया पत्रकार रेणु त्वानावासुयात लःल्हाःगु खः ।
उकथं हे ज्याझ्वलय् स्वम्हसित विशेष सम्मान नं याःगु दु । सञ्चार माध्यमया समावेशीकरण व नेपालभाषा व संस्कृतियात च्वन्ह्याकेगु ज्याय् महत्वपूर्ण योगदान याःगु धकाः आदिवासी जनजाति पत्रकार महासंघया पुलांम्ह नायः डण्ड गुरुङ्ग, गोरखापत्र न्हिपौया सल्लाहकार सम्पादक उपेश महर्जन व गुठी संस्थानया केन्द्रीय प्रशासक किरण शाक्ययात विशेष सम्मान याःगु खः ।
ज्याझ्वलय् नेवाः पत्रकार राष्ट्रिय दबूया केन्द्रीय नायः नृपेन्द्र लाल श्रेष्ठ, न्वकू सुरेन्द्र भक्त श्रेष्ठ, सिरपाः समितिया संयोजक सुनिल महर्जन, दबूया येँ कचाया नायः अर्विनमान सिंह, येँ महानगरपालिकाया प्रवक्ता नवीन मानन्धर, आदिवासी जनजाति पत्रकार महासंघया नायः गजुरधन राई, सिरपाः कयादीपिंपाखें सिल्भिया राजोपाध्याय, सम्मानित पत्रकारपाखें डण्ड गुरुङ्ग लिसेंया मनूतय्सं थःथःपिनि नुगःखँ तयादीगु खः ।
ज्याझ्वः दबुया महासचिव केके मानन्धरं न्ह्याकादीगु खः।
