ने.सं. ११४५ चिल्लागाः अस्तमि¸सनिबारखुन्हु बागमती प्रदेश सरकार¸संस्कृति तथा पर्यटन मन्त्रालय, पर्यटन कार्यालय व नेपालभाषा एकेडेमिया मंकाः ग्वसालय् मकवानपुरया हेटौंडाय् छगू नेपालभाषा प्रवर्द्धन ज्याझ्वः जूगु दु । नेपालाभाषायात नं बागमती प्रदेश सरकारं सरकारी कामकाजी भाषा धकाः घोषणा याःगु सन्दर्भय् नेपालभाषा एकेदेमिं भाषिक जागरण अभिमुखीकरणया निंतिं आधारपत्र नं न्ह्यब्वःगु उगु ज्याझ्वः नेपालभाषा अभियन्ता व भाषाविद् पौभाः साय्मिया मूनायःसुइ जूगु खः । नेपालभाषाया संरक्षण व प्रवर्द्धनया निंतिं सरकारयात कुला च्वनेमाःगुया लिसें नेवाः समुदाय हे सक्रिय जुयाः न्ह्यज्याये माःगु खँय् ज्याझ्वलय् ब्वति कयादीपिन्सं बः ब्यूगु दु ।
ज्याझ्वलय् मूपाहांकथं ब्वति कयादिसे हेटौंडा उपमहानगरपालिका, २ वडाया वडा नायः अले नेवाः देय् दबू, बागमती प्रदेशया पुलांम्ह नायः विष्णुगोपाल महर्जनं भाय् मन्तकि जात जक दयां छुं अर्थ मदइगु जूगुलिं भाषा संरक्षण व प्रवर्द्धनय् नेवाः समुदाय सचेत जुइमाः । भाय् व तजिलजि धयागु देय्या नं मंकाः सम्पत्ति खः । संयुक्त राष्ट्र संघय् झीगु पहिचानया निंतिं झीगु हे रन्जना आखः न्ह्यब्वःगु खँ कनादिसे वय्कलं थःपिनि भाषा व तजिलजियात गर्व यानाः न्ह्यज्याये फःसा जक देसय् विकासं दीर्घकालीन गति कायेफै धकाः धयादिल । ज्याझ्वलय् नेपालभाषा एकेडेमिया प्राज्ञ विद्या चित्रकार, पाटन संयुक्त क्याम्पसया प्राध्यापक किशोर नेपाली, नेपाली कांग्रेसया नेता व भाषा अभियन्ता अशोक शाक्य, बागमती प्रदेश, सामाजिक विकास मन्त्रालयया लैङ्गीक सम्पर्क ब्यक्ति चन्द्रा ब्यञ्जनकार, नेवाः देय् दबू बागमती प्रदेशया छ्यान्जे गणेश कुमार श्रेष्ठ लिसेंया मनूतय्सं नेपालभाषा प्रवर्द्धन ज्याझ्वः, एकेडेमिं भाषिक जागरण अभिमुखीकरणया निंतिं न्ह्यब्वःगु आधारपत्रया खँय् थःथःपिनि नुगःखँ दुग्यंक प्वंकादीगु थुगु ज्याझ्वः नेपालभाषा एकेडेमिया भाजु शान्तराज शाक्यं न्ह्याकादीगु खः ।
मुंज्या नायःया थासं पौभाः साय्मिं नेपालभाषाया महत्व नेवाःतय् निंतिं जक मखु, थ्व देय्या हे सम्पत्ति जूगुलिं सकलें सचेत व जिम्मेवार जुइमाःगु खँ कनादिल । छगू भाषा सीगु धयागु भाय् जक मखु, झीगु सम्पदा, तजिलजि व बिचाः नं तनावनीगु खः । उकिं नेपालभाषा सयेकेगु व च्वन्ह्याकेगु खँय् झी सकसिनं थःथःगु थासं कुतः यायेत आः लिबाके मजिल । थःगु भाय्या महत्व अझ विदेसय् वनेबलय् दुग्यंक खनेदइगु व थःगु पहिचानया निंतिं दकलय् न्हापां भाय् हे दं वइगु खँ नं कुलादिल । झीगु भाय् धयागु तसकं अःपुगु यइपुगु व न्ह्यइपुगु भाय् खः । थुकिया निताप्यता मौलिक आधारभूत खँत सीकेफत धाःसा थ्व ब्वनेच्वयेत छुं समस्या मजुइगु व अःपुक हे ब्वनेच्वये फैगु खँय् बः बियादिल । झीसं न्ह, म्ह, ल्ह थें जाःगु मन्त्रयुक्त आखः न्ववायेगु यानाच्वनागुलिं झी मेपिं स्वयां निदँ प्यदँ आयु ताःहाकः जुइगु धयागु खँ भाषा विज्ञानया खँ लिसे नं ज्वःलाः धयादिसे झीसं फचिंफत्तले झीगु हे भाय् ल्हायेमाः धकाः नं कनादीगु खः ।
ज्याझ्वःया लिपतय् मूपाहांपाखें ब्वति कयादीपिं सकसितं च्वछाना–पौ लःल्हायेगु ज्या नं जूगु खः । थुकथंया अभिमुखीकरण ज्याझ्वः मकवानपुया हेटौंडाया लिसें नुवाकोट, दोलखा, रामेछाप, सिन्धुली, चितवन, सिन्धुपाल्चोक काभ्रेपलाञ्चोक व धादिङ्गय् नं जुयाच्वंगु दु ।
