म्हिगः ने.सं. ११४५ चौलाथ्वः दसमि, सोमबारखुन्हु ‘च्वसापासा’ कुलांभुलुइ जूगु छगू बःचाधंगु ज्याझ्वःया दथुइ पुलांम्ह च्वमि प्रदिप आर तुलाधरजुया न्हूगु निगू सफू ‘ख्युंथाय् चिलाख च्याइ’ गजल व ‘मिखा तिस्सीमाःगु ई’ चिबाखं सफूया पितब्वज्या जुल ।
नेपालभाषा एकेडेमिया भाइस चान्सलर मूपाहां भाजु पुष्षराज राजकर्णिकारजुं त्वाःद्यवाय् मत च्याकाः न्ह्याकादीगु उगु पितब्वज्या ज्याझ्वः समालोचक भाजु पूर्णकाजी ताम्राकारया मुंज्यानायःसुइ जूगु खः । ज्याझ्वलय् मूपाहांया लिसें पाहांपिं भूषणप्रसाद श्रेष्ठ, ध्रुब मधिकःमि, पूर्ण काजी ताम्राकार व पौभाः साय्मिपिन्सं मंकाःकथं उगु निगू सफूया पितब्वज्या यानादीगु खः ।
पिदंगु सफूयात कयाः भाजुपिं पुष्षराज राजकर्णिकार, ध्रुब मधिकःमि, भूषण प्रसाद श्रेष्ठजुपिन्सं थःथःपिनि नुगःखँ तयादीगुया लिसें सफुती दयाच्वंगु मगाःमचाःयात तकं कुलादीगु खः । झीसं झीगु यइपुगु अःपुगु व न्ह्यइपुगु भासं हे ब्वनेच्वये यायेमाःगु व ब्वनेच्वये यायेबलय् सुद्धता व सम्पादनय् ध्यान बियावने माःगु खँय् बः बियादिसे सफू पिदंगु लसताय् भाजु पौभाः साय्मिजुं भिन्तुना नं द्यछया दिल ।
लिपतय् मुंज्या नायःया थासं भाजु पूर्णकाजी ताम्राकारजुं सफूयात कयाः दुग्यंक कुलादीगुया लिसें ज्याझ्वलय् ब्वति कयादीपिं सकसितं सुभाय् नं द्यछाया दिल ।
