ख्वप– स्वनिगःया द्यःब्रम्हू राजोपाध्यायपिनि कुसा संगठन राजोपाध्याय समाजय् हानं छक्वः सञ्जय शर्मा राजोपाध्याययात नायलय् ल्यःगु दु । वंगु सनिबार ख्वपय् जूगु समाजया प्यक्वःगु अधिवेशनं नृत्य कलाकारलिसें नृत्य निर्देशक तकं जुयादीम्ह राजोपाध्याययात निक्वः खुसी नायलय् ल्यःगु खः ।
नायः ल्यःगु घोषणाया लिसें राजोपाध्यायं आधुनिक विज्ञान व प्रविधियात नापं स्वाकाः समाजया धर्म, तजिलजि, परम्परायात ल्याय्म्ह पुस्तायात लःल्हायेगु ज्याय् थः न्ह्यज्यायेगु धकाः कनादिसे ब्यक्तिगत बाय् पारिवारिक भावना स्वयां समाजयात प्राथमिकताय् तयाः सकलें छप्पँ छधी जुयाः समाजयात च्वन्ह्याकेगु ज्याय् जायेत इनाप यानादिल । वय्कलं मेगु निदँया निंतिं समाजया नेतृत्व यानादी ।
अधिवेशनपाखें निर्विरोध ल्यःपिं १३ म्ह जः दुगु ज्यासना पुचलय् निम्ह न्वकूपिं रचना शर्मा राजोपाध्याय व सञ्चारकःमि बिराजकाजी राजोपाध्याय, मूछ्यान्जे बन्दना शर्मा राजोपाध्याय, छ्यान्जे विजय शर्मा राजोपाध्यायपिन्त ल्यःगु दु । अथे हे दांभरिंकथं उद्धव आचार्य राजोपाध्याय व ल्यू दांभरिंकथं चेतना देवी शर्मा राजोपाध्याययात अले दुजःकथं बिरु सुबेदी राजोपाध्याय, किशोर शर्मा राजोपाध्याय, महेशबाबु शर्मा राजोपाध्याय, त्रिलोचन राजोपाध्याय, श्रीमणिराज शर्मा राजोपाध्याय व गिरिश शर्मा राजोपाध्यायपिन्त ल्यःगु खः । ल्यंगु निम्ह दुजः धाःसा ज्यासना पुचलं ल्यइ धकाः धाःगु दु ।
थ्वयां न्ह्यः जूगु अधिवेशनया उलेज्या सत्रय् प्रा. डा. पुरुषोतम लोचन श्रेष्ठ, नेपाल प्रज्ञा प्रतिष्ठानया प्राज्ञ अगिव बनेपालि, यल नेवाः समाजया नायः विनोद ताम्राकार, ज्योतिषाचार्य वीरेन्द्र प्रसाद कायस्थ लिसेंया मनूतसें नेवाः समाजय् सनातन धर्म, तजिलजिया संरक्षण, संवर्धनय् राजोपाध्याय समाजया भूमिका महत्वपूर्ण दुगु खँय् बः बियादीगु खः ।
अथे हे समाजया पुलांम्ह नायः अमर राज शर्मा राजोपाध्याय व पलिस्था नायः बदन ज्वालानन्द राजोपाध्याय, न्वकू रचना शर्मा राजोपाध्यायपिन्सं– ब्यक्तिगत भावना व बिचाः स्वयां समाजयात प्राथमिकताय् तयाः ब्याक्क समाजयात हे च्वन्ह्याकेगु निंतिं न्ह्यज्यायेत इनाप यानादिल । ब्याकरणाचार्य गजानन्द राजोपाध्यायं धर्म, तजिलजियात बांलाक थुइकेगुया लिसें थुकियात संरक्षण यायेत संस्कृत सयेकेमाःगु खः बः बियादिल ।
ज्याझ्वलय् समाजं २०७८ श्रावणनिसें २०७९ असारतक स्वनिगःया स्वंगुलिं शहर येँ, यल व ख्वपया शिवालयस ग्वसाः ग्वःगु पञ्चाभिषेक रुद्री, २०७९ श्रावणय् येँया मखनय् महिन्द्रेश्वर महाद्यइथाय् ग्वसाः ग्वःगु अयुताहुती यज्ञ, २०७८ व २०७९ दँया एसइइ ताःलाःपिं राजोपाध्याय ब्वँनामिपिन्त हनेज्या याःगु खः । अथे हे समाजं ग्वसाः ग्वःगु मे हालेगु धें धें बल्लाः ‘गायन प्रतिभाको खोजी’इ त्याःपिन्त सिरपाः ब्यूगु खःसा समाजया जिल्ला समन्वय समिति, येँपाखें ग्वसाः ग्वःगु स्वलाया संस्कृत प्रशिक्षणया प्रशिक्षार्थीपिन्त दसिपाै नं इंगु खः ।
ज्याझ्वलय् समाजं पिथंगुया लिसें थी थी सफूया ब्वज्या व मीगु ज्यातकं जूगु खः ।
