येँ – उदाय् समाजया ग्वसालय् उदाय्तय्गु सामाजिक विधि व्यवहारयात कयाः सहलह ज्याझ्वः जूगु दु । ज्याझ्वलय् सामाजिक विधि व्यवहारया कार्यान्वयन गथे यानाः यानावनेगु व आःया विधि व्यवहारय् गुकथंया सुधार यायेगु धकाः उदाय् समुदायया थी थी खलः पुचःया मिसा पुचःया पदाधिकारीपिनि दथुइ शुक्रबाः जमलया ज्योति भवन, ग्रायण्डी सिटी अस्पतालया सभाकक्षय् सहलह जूगु खः।
ज्याझ्वलय् उदाय् समाजया नायः डा. रुपज्योति कसालं उदाय् समाजं पिथनातःगु सामाजिक विधि व्यवहारया थी थी पक्षयात कःघानाः नुगःखँ प्वंकादीगु खः । ज्याझ्वलय् थी थी मिसा पुचःयात थःथःगु समूह दयेकाः समूहगत रुपं सहलह ब्याके बियाः सहलहपाखें पिहां वःगु लिच्वःयात टीम लिडरपिं न्हुच्छे शोभा ताम्राकार, सुमित्रा तुलाधर, प्रमिला कसाः, मिनु तुलाधर, गौरीशोभा सिन्दुराकार, मन्दिरा तुलाधरपिन्सं न्ह्यब्वया दीगु खः। थुकिया सहजीकरण उदाय् समाज मिसा पुचःया न्वकू डा. सुमन कमल तुलाधरं यानादीगु खः।
ज्याझ्वलय् उदाय् समाज मिसा पुचःया नायः कीर्ति तुलाधर व पुचःया न्वकू डा. सुमन कमल तुलाधरपिन्सं नं सामाजिक विधि व्यवहारया थी थी पक्षयात कःघानाः थःथःपिनि नुगःखँ तयादीगु खः ।
ज्याझ्वलय् उदाय् समाज विधि व्यवहार उपसमितिया कजि सुमित्रा तुलाधरं लसकुस न्वचू बियादीगु खःसा उदाय् समाजया मूछ्याञ्जे रजनी ताम्राकारं नं थःगु नुगःखँ तयादीगु खः ।
