येँ– वरिष्ठ निवन्धकारलिसें आधुनिक कवि मदुम्ह पूर्ण वैद्यया निदँ तिथिया लुमन्तिइ ‘नेवाः खँग्वःया पिला’ सफू पितब्वज्या जूगु दु। वय्कःया स्वम्ह शिष्यपिं प्रतिसरा साय्मि, मनदेवी ताम्राकार व मोतीलक्ष्मी शाक्यं ‘नेवाः खँग्वःया पिला’ पिकया दीगु खःसा म्हिगः येँया न्हूगु बानेश्वरय् जूगु ज्याझ्वलय् सफूया पितब्वज्या जूगु खः।
सफूया पितब्वज्या वरिष्ठ साहित्यकारलिसें परोपकार संस्थाया नायः हितकर वीर सिंह कंसाकार, नेपाल प्रज्ञा प्रतिष्ठानया उपकुलपति विमल निभाः, नेवाः न्ह्यलुवाःलिसें नेपालभाषा एकेदेमिया उपकुलपति मल्ल के सुन्दर लगायतं मंकाःकथं यानादीगु खः ।
ज्याझ्वलय् परोपकार संस्थाया नायड्ड हितकर वीर सिंह कंसाकार, नेपाल प्रज्ञा प्रतिष्ठानया उपकुलपति विमल निभाः, नेवाः न्ह्यलुवाःलिसें नेपालभाषा एकेदेमिया उपकुलपति मल्ल के सुन्दर, नेपाल साहित्य मन्दिरया निर्वतमान नायः तिलक प्रकाश कायस्थ, साहित्यकार सुलोचना मानन्धर, समालोचक पूर्णकाजी ताम्राकार, साहित्यकार सुवर्णकेशरी चित्रकार, कवि पूर्ण बैद्यया जहान मीरा शाक्य वैद्यं नेवाः खँग्वःया पिला पिकयादीपिं स्वम्हसित भिन्तुना द्यछासें थुगु सफू तसकं ज्या ख्यले जूगु सफू जूगुलिं सकसित ब्वनेत इनाप यानादिल।
सफू पिकया दीपिं प्रतिसरा साय्मि, मोतिलक्ष्मी शाक्य व मनदेवी ताम्राकारं सफू निर्माणया पक्षयात कयाः जानकारी बियादीगु खः। दच्छि न्ह्यः नं मदुम्ह कवि पूर्ण वैद्यया अप्रकाशित लेख रचनात मुंकाः वय्कःया न्याम्ह शिष्यपिं प्रतिसरा सायमि, मोतिलक्ष्मी शाक्य, मनदेवी ताम्राकार, जानकी दलि व कुन्दन प्रसाद श्रेष्ठं गुरू दक्षिणाकथं सफू पिथना दीगु खः।
वय्कः नगुने ११४१ गुंलागाः चौथि, बसुबार (भाद्र १० गते) खुन्हु कोरोना भाइरसया संक्रमणं यानाः मदुगु खः।
