यल -नेपालभाषा अःपुक ब्वनेच्वये सयेकेगु लागि नेपालभाषाया मिसा साहित्यकारतय्त प्रशिक्षण बिइगु लागि यलय् ज्याझ्वः जूगु दु। ज्याझ्वः मिसा साहित्यकार मुनाया ग्वसालय् म्हिगः ने.सं. ११४३ यंलागाः अस्तमि, सनिबारखुन्हु यलया त्यागलय् दुगु नेपालभाषा मंकाः खलःया सभाहलय् जूगु खः।
मिसा साहित्यकार मुनाया नायः अन्जना ताम्राकारया मुंज्यानायःसुइ जूगु ज्याझ्वलय् मंकाः खलः यलया नायः हिराकाजि महर्जनं थौंकन्हय् झीगु भाय् अःपुक व यइपुक छ्यलाबुला जुइमाःगु खँ न्ह्यँथसे यलय् नेपालभाषाया अवस्था व मंकाः खलः यलया थःगु हे थी थी खँ न्ह्यथना दीगु खः ।
ज्याझ्वलय् भाषाविद् पौभाः साय्मिं नेवाः भाय् गथे यानाः मद्वंक अले अःपुक व यइपुक ब्वनेच्वये यायेगु धयागु खँय् दुग्यंक कुलाः स्यनेकने यानादीगु खः ।
ज्याझ्वःलय् मिसा साहित्यकार मुनाया नायः ताम्राकारं ब्वति कयादीपिं सकसितं सुभाय् द्यछासें मिसा साहित्यकार मुनापाखें भाय् व साहित्यया खँय् थी थी ज्याखँ यानावं च्वनागु व थुकथं नेवाःभासं अःपुक ब्वनेच्वये यायेगु थुज्वःगु ज्याखँ हानं हानं न्ह्याकेगु जुइ धकाः नुगःखँ तयादीगु खः।
ज्याझ्वलय् मिसा साहित्यकार मुनाया नायः ताम्राकारं स्यनेकने यानादीम्ह पौभाः साय्मियात मतिनाया चिं नं द्यछाया दीगु खः । ज्याझ्वलय् साहित्यकार मुनाया न्वकू दिब्या ताम्राकारं सकसितं लसकुस यानादीगु खः ।
