नेपालभाषाया प्यंगः थां मध्यय् छगः थां मास्टर जगतसुन्दर मल्लया १४१ क्वःगु बुन्हिया झ्वलय् हलिं नेवाः दबू, केन्द्रीय समितिया ग्वसालय् जूमपाखें मांभासं शिक्षाया विषयस सहलह मुंज्या जूगु दु । सहलह मुंज्या वंगु ने.सं. ११४३ कौलागाः त्रयोदसि, क्वःपुजा खुन्हु (नोभेम्वर ११) जूगु खः।
हलिं नेवाः दबूया केन्द्रीय नायः भाजु संयुक्त श्रेष्ठं मास्टर जगतसुन्दर मल्लया किपाया न्ह्यःने न्हूगु प्रविधि छ्यलाः कम्प्यूटर प्रोग्रामपाखें त्वाःद्यवाय् मत च्याकाः उलेज्या यानाः न्ह्याःगु सहलह मुंज्याय् केन्द्रीय नेपालभाषा विभागया पुलांम्ह प्रमुख सहप्राध्यापक तुल्सिलाल सिंहंं मास्टर जगतसुन्दर मल्लं उगु इलय् न्ह्याकादीगु मांभाय्या शिक्षाया अभियानयात आः झीपिं सकलें जानाः सफल यायेमाःगु खँ प्वंकादिल । वय्कलं यल महानगरपाखें वय्कःया न्ह्यलुवाःसुइ नकतिनि तयार जूगु स्थानीय विषयया नेपालभाषा पाठ्य सफूया मर्मया बारे थःगु खँ दुग्यंक न्ह्यब्वया दिल । यल महानगरपाखें नर्सरी केजिं निसें स्वंगू तगिं तकया निंतिं पाठ्य सफू तयार जूगु खँ नं वय्कलं जानकारी बियादिल।
सहलह मुंज्याय् मांभाय् शिक्षाया अभियन्ता पुलांम्ह प्रधानाध्यापिका विद्या चित्रकारं येँ महानगरपालिकां स्थानीय विषयस नेपालभाषां ब्वंकाच्वंगु शिक्षाया गतिविधि दुग्यंक न्ह्यब्वया दिल । येँ महानगर पालिकाया शिक्षा कवःया विज्ञकथं नं ज्या याना च्वनादीम्ह चित्रकारं येँ महानगर पालिकां नेपालभाषां ब्वंका वयाच्वंगु स्थानीय विषय तसकं सफल जुजुं वनाच्वंगु खँ न्ह्यथना दिल।
सहलह मुंज्याय् हलिं नेवाः दबूया साहित्यिक एम्वेसदर लोककवि राजभाइ जकःमिंं मास्टर जगतसुन्दर मल्लया व्यक्तित्व व कृतित्व दुथ्याःगु चिनाखँ ब्वनाः न्यंकादीगु खः । हलिं नेवाः दबूया न्वकू समन्त वज्राचार्यंं सुभाय् द्यछाना दीगु व दुजः डा. नरेश शाक्यंं सहजीकरणया भूमिका म्हितादीगु थ्व ज्याझ्वलय् मल्ल (प्रधानांग) प्रतिस्थानया न्वकू राजाराम प्रधानाङ्ग व आर.आर. क्याम्पसया ब्वनामि रिदेन महर्जनं नं मांभाय्या शिक्षाया खँय् थःपिनिगु नुगःखँ प्वंकादीगु खः।
