यल – थःपिनि समुदाय दुनेया सुलाच्वंगु प्रतिभा मालेगु ता तयाः राजोपाध्याय समाजं मे धें धें बल्लाः ज्याझ्वःया ग्वसाः ग्वःगु दु । म्हिगः ११४४ कछलाथ्वः त्रयोदसि, सनिबार यलय् जूगु मे धें धें बल्लाःया बिजं ज्याझ्वलय् सक्षम शर्मा न्हाप, सुभिया राजोपाध्याय ल्यू व सौरभ राजोपाध्याय लियांल्यू लाःगु खः ।
कलानिधि इन्दिरा संगीत महाविद्यालयया प्रधानाध्यापक धन बहादुर गोपालि, संगीत संयोजक भूपेन्द्र बज्राचार्य व नेपाःया न्हापांम्ह हवाइन गितारवादक ईश्वर जोशी दुथ्याःगु निर्णायक पुचलं धें धें बल्लाःया मेयात मूल्यांकन याःगु खः । ने.सं. ११४० चिल्लाथ्वः चौथि, सुक्रबार (२०७६/११/१७)खुन्हु जूगु अडिसनं ल्यःपिं धें धें बल्लाःया मेहालामिपिनि दथुइ बिजं धें धें बल्लाः ज्याझ्वः जूगु खःसा उगु अडिसनं सक्षम, सुभिया व सौरभया लिसें नृश्मा, बबिन, शुभद्रिका, राजेश्वरी व शिरिषपिन्त ल्यःगु खः ।
त्याःपिं धें धें बल्लाःया मेहालामिपिन्त ट्रफि लःल्हाना दिसे निर्णायक गोपालिं गायन, सुर, ताल, भाषिक स्पष्टता थें जाःगु खँया लिधंसाय् मेहालामिपिनिगु गायन क्षमताया मूल्यांकन यानागु खँ न्ह्यथना दिसे गायन क्षेत्रं थौंकन्हय् समाजय् बांलाःगु थाय् कायेफुगुलिं थःपिनि काय्म्ह्याय्पिन्त थुगु ख्यलय् पलाः तयेकेया निंतिं लकस दयेकेगु व हःपा बीगु ज्या यानादीत छेँजःपिन्त इनाप नं यानादिल ।
मे धें धें बल्लाःया संयोजक व समाजया पलिस्था नायः बदन ज्वालानन्द राजोपाध्याय व नायः संजय शर्मा राजोपाध्यायं मे धें धें बल्लाःया आज्जु व समाजया ज्याखँय् जानकारि बियादीगु खः ।
ज्याझ्वलय् मेहालामि सुरज वीर बज्राचार्य, निर्णायक पुचःया दुजः भूपेन्द्र बज्राचार्यं गायन अले मुनिन्द्र ज्वालानन्द राजोपाध्याय व विनित ज्वालानन्द राजोपाध्यायं सारंगी व बाँसुरी वादन न्ह्यब्वया दीगु खः ।
ज्याझ्वलय् समाजया निर्वतमान नायःलिसें वरिष्ठ संगीतकार अमर राज राजोपाध्याय् लगायतया उपस्थिति दुगु खसाः ज्याझ्वः माधुरी मनसा शर्मां न्ह्याकाःदीगु खः।
त्याःपिं मेहालामिपिन्त ध्यबा सिरपाः समाजया दँ मुंज्याय् बीगु धकाः समाजं धाःगु दु ।
