थ्व हे ने.सं. ११४४ चौलागाः एकादसि, सनिबारकुन्हु अन्तराष्ट्रिय हाइकु दिवस अप्रिल १७ या लसताय् थनया गौतम बुद्ध सभाकक्ष, महान्यायाधिवक्ता कार्यालय भवन, सिंहदरवारय् जूगु छगू समारोहस हनेबहःम्ह पूर्व प्रधानन्यायाधीस भाजु कल्याण श्रेष्ठजुं नेपालभाषाया आधुनिक गद्य कविताया छम्ह न्ह्यलुवाः, हाइजिन भाजु श्यामसुन्दर सँय्जुया ‘हाइकु किचः’ नांगु सफूया विमोचन यानादिल । समारोहया मूपाहां जुयादीम्ह पूर्व प्रधानन्यायाधीस भाजु कल्याण श्रेष्ठजुं थःगु मून्वचू बीगु झ्वलय् म्ह्व खँग्वः, गहन बिषय, गहन संप्रेशन, गहन चेतनायात सशक्त रुपं न्ह्यब्वयेगु माध्यम हाइकु जुयाच्वन धकाः धयादिसें थःत नं हाइकुं सालाकाल धकाः धयादिल । वहुआयामिक व्यक्तित्व श्यामसुन्दरजुया योगदानयात कदर यायेया निंतिं प्रतिष्ठान चायेकेगु आदि ज्याय् थम्हं माक्व ग्वहालि यायेगु बचं नं वय्कलं बियादिल । थ्व सिबें न्ह्यः नेवाः हाइकु ख्यःया नायः लिसें सभाया नायः जुयादीम्ह भाजु सुरेश प्रधानजुं नेपालय् हाइकु च्वयेगु ज्या न्ह्याःगु ई ने.सं. १०७९ (२०१६) सालं निसें हे हाइकु च्वयाः वया च्वनादीम्ह भाजु श्यामसुन्दर सँय्जुया हाइकुत पाण्डुलिपिइ जक लिकुना च्वंगुयात पित बीमाःगु थौंया आवश्यकतायात नेवाः हाइकु ख्यलं महसुस यानाः थ्व ज्या न्ह्याकागु खः धयादिल । लिसें समालोचक डा. ज्योतिप्रभा तुलाधरजुया धापूयात लिसा कासें वय्कलं सँय्जुया हाइकुइ थम्हं न्हियान्हिथंया जीवन क्रमय् खंगु व अनुभव यानागु बिषय, घटना, उकिया दथुइ दुगु अन्तरविरोध, संघर्ष, विडम्बना आदियात थी थीकथं बिश्लेषण यानाः, चिन्तन यानाः अभिव्यक्त याःगु दु धयादिल । उगु समारोहय् वरिष्ठ कवि, समालोचक डा. आनन्द जोशीजुं कवि श्यामसुन्दर सँय्जु नेपालभाषाया आधुनिक गद्य कविता न्ह्याकामि मध्यय्या छम्ह न्ह्यलुवाः कवि खः धयादिल । लिसें वय्कःया हाइकुं नेपालभाषाय् न्ह्यानाच्वंगु परम्परागत हाइकु व आधुनिक हाइकुया दथुइ च्वनाः ताँया भूमिका निर्वाह याःगु खँ कनादिल । अथे हे, सफूया प्रकाशक वरिष्ठ अधिवक्ता, श्यामसुन्दर सँय्जुया तःधिकःम्ह म्ह्याय् मय्जु अमितालक्ष्मी सँय्जु श्रेष्ठं लिबाक्क हे जूसां थः अबुया कृतियात पिथने दुगुलिं थःपिनि सकल जः तसकं लय्ताया च्वनागु दु धयादिल । थः बाः श्यामसुन्दर सँय्जुया वहुआयामिक व्यक्तित्वया थी थी पक्षयात दुवालादिसे वय्कलं थः बाःनं च्वया थकादीगु रबिन्द्रनाथ टैगोरया अनुवाद ‘गितान्जलि’ व खस् नेपाली भाषाय् च्वयादीगु ‘चस्काहरु घाउका’ धयागु कविता सफू नं याकनं प्रकाशनय् हयेगु खँ कनादिल । नेवाः हाइकु ख्यःया ग्वसालय् जूगु उगु ज्याझ्वः भाजु धर्मकृष्ण सिकःमिजुं न्ह्याकादीगु खःसा उगु समारोहस साहित्यकार मोहन दुवाल, साहित्यकार डा. सुमन ताम्राकार, हाइजिन लिसें नेवाः हाइकु ख्यःया न्वकू भाजु तुयू पुंजुं नं कवि श्यामसुन्दर व वय्कःया हाइकुया थी थी पक्षयात कयाः थःगु नुगःखँ प्वंकादीगु खः ।
