जर्मनिइ च्वनाच्वंपिं नेवाः समुदायया संस्था पासा पुचः जर्मनिं वंगु आइतबार ‘नेवाः तजिलजि नखः’ ज्याझ्वःया ग्वसाः ग्वयाः तःजिक हंगु दु । जर्मनीया सफल ब्यवसायी व समाजसेवि अले ज्याझ्वःया संयोजक भाजु शंकर महर्जनं ज्याझ्वःया उद्देश्यया बारे न्ववाना दिसे झीगु कला, तजिलजि, भाय्, भेषभूषायात संरक्षण यायां भावी पुस्तायात लःल्हाना वनेत थुगु ज्याझ्वःया ग्वसाः ग्वयागु खँ कनादिल ।
ज्याझ्वलय् नेवाः समय्बजिया ब्यवस्था जूगु खःसा लाखे प्याखं, लाइभ म्यूजिक लिसेंया थी थी मे व प्याखं हुइकूगु खः । ज्याझ्वःया मू आकर्षणया कथं ख्वपया नांजाःगु सापारु प्याखं ‘घिन्ताङ किसि त्वाक्’ प्याखं क्यंगु खः । उगु प्याखं बाजंया तालय् अन दुपिं नेवाः व नेवाः मखुपिंया लिसें जर्मनी व मेगु थी थी देय्या मनूत यानाः १०० म्ह स्वयां अप्वः मनूतसें उत्सुक जुयाः प्याखं हूगु खः ।
ज्याझ्वः ताःलाकेगुया निंतिं संयोजक शंकर महर्जन व जगत बहादुर जोशी लिसेंया पासा पुचः फ्रङ्फोर्टया सकल दुजःपिनि कुतलं ज्याझ्वः तःजिक क्वचाःगु धकाः ग्वसाः खलकं धाःगु दु ।
ज्याझ्वःयात ताःलाकेत हलिं नेवाः दबू, केन्द्रया न्वकू रजनी प्रधान, सल्लाहकार रविन्द्र मान श्रेष्ठ, दिनेश प्रधान, हलिं नेवाः दबूया यूरोप कोर्डिनेटर व नेवाः खलः ह्याम्बर्गया नीस्वनामि कुमार नापित, नेवाः खलः ह्याम्वर्ग जर्मनीया नीस्वनामि नायः मानव कुमार श्रेष्ठ व नेपालय् अपाङ्गता लागाय् ४ दशकनिसें सेवा याना च्वनादीम्ह रमेश श्रेष्ठया मूवंगु ग्वाहालि दुगु खः । थ्व हे झ्वलय् झीगु नेवाः नखः तजिलजि हनेत विशेष रुपं पासा पुचः गुथिदुने च्वनादीपिं सकल भाजु मय्जुपिन्त ग्वसाः खलःपाखें यक्व यक्व सुभाय् नं द्यछाःगु दु ।
