न्हूगु ज्यासना पुचः ल्ययाः नेवाः गुथि, न्यूयोर्कया गुक्वःगु तःमुंज्या क्वचाःगु दु । तःमुंज्यापाखें आःया नायः विजयमान सिंहयात १०६ गू मतया लिसें हानं नायलय् ल्यःगु दु । वय्कःया लिसें दनादीम्ह सिर्जना तुलाधरं ६२ गू मत कयादीगु खः।
नायः पदया निंतिं निम्हसियां उम्मेदबारि बियादीगु खःसा ज्यासना पुचःया मेपिं दुजःपिन्त धाःसा निर्विरोध ल्ययेगु ज्या जूगु खः । अन्जन श्रेष्ठया नायःसुइ राजेन्द्र महर्जन व रोसन महर्जन दुजः दुगु ल्यज्या पुचलं ल्यज्या क्वचायेकूगु खः ।
ल्यज्या स्वयां न्ह्यव जूगु तःमुंज्याया उलेज्या ज्याझ्वलय् गुथिया संस्थापक बि.के. नेवालं गुथिया महत्व व आज्जुया खँय् कुलादीगु खः । ज्याझ्वलय् नीस्वना नायः आदित्य महर्जन, पुलांम्ह नायः समिर महर्जनं नेवाः गुथिया खँय् न्ववाना दिसे सकलें जानाः गुथियात न्ह्यज्याके माःगु खँय् बः बियादीगु खः । सजना महर्जनया लसकुस न्वचुं सुरु जूगु ज्याझ्वलय् गुथिया मूछ्यान्जे सन्तोष महर्जनं दच्छिया प्रतिवेदन व दांभरिं हृदय तुलाधरं आर्थिक प्रतिवेदन न्ह्यब्वया दीगु खः । ज्याझ्वःया मू पाहां नेवाः नखःया नायः महेन्द्र वज्राचार्यं गुथिया गुक्वःगु तःमुंज्याया लसताय् भिन्तुना बियादीगु खः ।
गुथिया नायः विजयमान सिंहया नायःसुइ क्वचाःगु ज्याझ्वः रामकृष्ण महर्जनं न्ह्याकादीगु व थुगु ज्याझ्वः उडसाइड रेस्टुरेन्टय् जूगु खः।
थ्वया दथुइ नेवाः गुथि व नेवाः नखः निगुलिं संस्था जानाः नेपाल संबत् ११४४ न्हूदँया लसताय् उखुन्हु हे सुथय् भिन्तुना र्यालि व भिन्तुना कालबिल ज्याझ्वःया नं ग्वसाः ग्वःगु खः ।
