येँ – नेवाः भाय्यात बाग्मति प्रदेशय् सरकारी कामकाजि भाय्या कथं मछ्यःतले दिपाः हे मकासे नेवाःत न्ह्याः वनीगु जूगु दु । सनिबार नेवाः देय् दबू स्वनिगः विशेष प्रदेशया ग्वसालय् जूगु ज्याझ्वलय् नेवाः देय् दबूया केन्द्रीय नायः पवित्र बज्राचार्य नापं स्वनिगः विशेष प्रदेशया नायः श्रीकृष्ण महर्जनं थज्याःगु खँ तयादीगु खः ।
देय् दबूया केन्द्रीय नायः बज्राचार्य नापं स्वनिगः विशेष प्रदेशया नायः महर्जनं बाग्मती प्रदेशय् राष्ट्रभाषा ऐन लागु मजूतले राजनीतिक दल, बाग्मति प्रदेशया सांसदतय्त मद्दिक खबरदारि यानाच्वनेगु नाप नापं जनताय् वनाः नं माःगु कथं थुइकेगु ज्या यायेगु जुइ धयादिल । अथे हे यदि भाषाया थुगु अधिकार प्राप्त मजुल धाःसा अथवा ऐन पारित यायेगु ज्या मयात धाःसा आन्दोलन यायेत तकं तयार जुइमाः धकाः धयादिल ।
बाग्मति प्रदेशय् नेवाः भाय् व तामाङ भाय् सरकारि कामकाजि भाय्कथं लागु याकेगु निंतिं मदिक्क कुतःया दथुइ प्रस्तावित ऐन प्रदेश सरकारया मुख्य मन्त्रीयात कार्यदलं लःल्हाये धुंकूगु दुसा आः संसदं पारित जुइवं कानुनकथं लागु जुइ । उकिया निंतिं छु यायेगु नापं उगु प्रस्तावित ऐनय् छु छु दु धयागु खँ ध्वाथुइकेभनं सनिबार येँय् नेवाः देय् दबू स्वनिगः विशेष प्रदेशया ग्वसालय् सहलह मुंज्या जूगु खः ।
नेवाः देय् दबू स्वनिगः विशेष प्रदेशया नायः श्रीकृष्ण महर्जनया नायःसुइ जूगु उगु सहलह ज्याझ्वलय् बाग्मति प्रदेश सरकारं दयेकूगु कार्यदलया दुजःपिं प्रा. डा. ओमकारेश्वर श्रेष्ठ नापं भाषा आयोगया दुजः भाषाविद् अमृत योञ्जन तामाङं बाग्मति प्रदेश सरकारयात लःल्हागु प्रस्तावित ऐनय् नेवाः भाय् व तामाङ भाय्यात बाग्मति प्रदेशया सरकारि कामकाजि भाषाया रुपय् लागु यायेगु बारे थःपिनिगु खँ तयादीगु खः। वय्कपिन्सं भाषाया ल्याखं सुनां नं अपमान यात, विभेद यात धाःसा कानुनि कारवाही यायेफइगु अले सरकारि निकायपाखें नेवाः भाय् व तामाङ भाय्यात लागु यायेगु सवालय् आलताल यात धाःसा उकियात कयाः कसुरया व्यवस्था तकं यानागु दु धकाः धयादिल ।
ज्याझ्वलय् नेवाः देय् दबूया केन्द्रीय न्वकूपिं उमेश स्थापित, शान्ता श्रेष्ठ, केन्द्रीय छ्याञ्जे मचाराजा महर्जन, नेवाः देय् दबू स्वनिगः विशेष प्रदेशया बरिष्ठ न्वकू नविन थेच्वमि, मुख्य सचिव गणेशमान श्रेष्ठ, छ्याञ्जे गंगादेवी महर्जन, दबूया येँ जिल्लाया नायः धनबहादुर महर्जत तिमिला, ख्वप जिल्लाया नायः नरेश नेवाः नापं यल जिल्लाया नेतृत्व व थी थी ब्यक्तित्वपिं व नेवाः देय् दबूया स्वनिगःया थी थी पालिकाया नेतृत्वपिन्सं नं ब्वति कयादीगु खः ।
