यल — वाङ्गमय शताब्दि पुरुष डा. सत्यमोहन जोशीया १०४ क्वःगु बुन्हि हनेगु झ्वलय् निगू साहित्य कृति सफू पितब्वज्या जूगु दु । वय्कःया बुन्हिया झ्वलय् लोक साहित्य परिषदं ग्वसाः ग्वःगु छवाःयंकया ज्याझ्वः अन्तर्गत बुधबार शताब्दि पुरुष डा. जोशिं च्वयादीगु मचा निचाखँ मुना “चखुंचां हाःगु म्ये” व मीना बज्राचार्यं च्वयादीगु मचाबाखं मुना “किसिया नसा क्वःया दशा”या पितब्वज्या जूगु खः ।
वरिष्ठ साहित्यकार हितकर वीर सिंह कंसाकार, विराट नेपालभाषा साहित्य सम्मेलन गुथिया नायः महेन्द्र गोपाल कर्माचार्य, शताब्दि पुरुष डा. जोशीया म्ह्याय् कावेरी जोशी, यल महानगरपालिका वडा १६ या वडा नायः निर्मलरत्न शाक्यपिन्सं मंकाःकथं सफूया पितब्वज्या यानादीगु खः ।
मूपाहांया आसनं नवायेगु झ्वलय् ज्याझ्वलय् वरिष्ठ साहित्यकार कंसाकारं मचा साहित्यया विकास धइगु हे भाषा विकासया पुर्वाधार जूगु धयादिल ।
मुंज्यानायःया आसनं नवायेगु झ्वलय् परिषदया नायः राजित श्रेष्ठं लोक साहित्य परिषदपाखें दच्छिया न्यागू मचासफू पिकायेगु ग्वसाः दुगु खँ कनादिल।
ज्याझ्वलय् नवाःपिं पाहांपिन्सं शताब्दि पुरुष डा. जोशीया देनयात लुमंकुसे मचा साहित्यया बारे चर्चा याःगु खः । परिषदया दुजः किरणकेन रन्जितं न्ह्याकादीगु ज्याझ्वलय् परिषदया दांभरिं वासुदेव श्रेष्ठं लसकुस न्वचु तयादीगु खः।
