येँय्– नेपाल लिपि गुथिया ४३ क्वःगु बुन्हिया लसता लाकाः ‘नेपाल लिपिया ऐतिहासिक, सांस्कृतिक व प्राज्ञिक महत्व’या खँय् सम्बाद ज्याझ्वः जूगु दु ।
गुथिया नायः अनिल स्थापितया नायःसुइ जमलय् शनिबाः जूगु ज्याझ्वलय् त्रिभुवन विश्वविद्यालय, नेपालभाषा केन्द्रीय विभागया प्रमुख राजन लाल जोशी व प्राध्यापक शरद कसाःपिन्सं नेपाल लिपिया ऐतिहासिक, सांस्कृतिक व प्राज्ञिक महत्वयात कयाः कुलादिसे थुगु खँय् छिमाःगु पलाःयात कयाः थःपिनि नुगःखँ तयादीगु खः ।
ज्याझ्वलय् नेवाः देय् दबूया नायः पवित्र बज्राचार्य व नेपालभाषा एकेदेमिया भाइस चान्सलर मल्ल के. सुन्दरं नेपाल लिपि गुथिया नीस्वना ईनिसें थौंतकया नेपाल लिपिया थी थी खँ लिसें थःपिनि खँ न्ह्यब्वया दीगु खः ।
सम्बाद ज्याझ्वलय् न्यूज नेपाः डट कमया नेपालभाषाया सम्पादक पौभाः साय्मि, न्यूज नेपाः डट कमया प्रकाशक बिगेन तुलाधर, जुजुभाइ तुलाधर, पुलांम्ह नायः निरन्जन ताम्राकार, दर्शन वीर शाक्यपिन्सं ब्वति कयादिसे थःथःपिनि नुगः खँ तयादीगु खः ।
