-सुगम ताम्राकार
न्हापा न्हापा येँ देय् दुने बुँज्या याइपिनिगु जातय् गुलि गुलिस्यां दँय्चा झंगः थःथःपिनि छेँय् लहीगु चलन दु । दँय्चा लहिना तःपिन्सं थःपिन्त गर्व तायेकाः समाजय् इज्जत दुपिं थें नं भाःपिया च्वनीगु, उकिं अमिसं दँय्चातय्त बांबांलाःगु पंजः दयेकाः लहिना तइगु । अले झंगःतय्त नं बांलाक्क सुसाःकुसाः नं याना च्वनी ।
धात्थें न्ह्यइपुगु व दुनेयागु ब्यबहारिक कथं धायेगु खःसा दँय्चा तयत् तालिम यानाः बुँइ यंकाः बुँइ अन्न बालि नःवइपिं मेमेगु जातजातिया झंगःत ख्याना छ्वयेत व बालि स्यंकीपिं कीचात नकेगु ज्याय् छ्यलेया निंतिं नं लहिना तइगु जुयाच्वन। हाकनं मेपिन्सं लहिना तःपिं दँय्चातय् नाप धें धें बल्लाः कासा म्हितकाः न्ह्यइपुकेगु नं चलन दु।
थौंकन्हय् ग्वंगः ल्वाकाः म्हितकेगु कासा थेंतुं न्हापा न्हापा दँय्चात नं ल्वाकाः न्ह्यइपुक्क म्हितीगु जुयाच्वन। तर जिं स्वये थ्व नेवाःतय्गु परम्परागत चलन थौंकन्हय् न्हना हे वनेधुंकल धाःसां छुं पाइमखु थें च्वं ।
अय्नं जितः व ईया कल्पना यानाः गथे च्वं जुइ धयागु अनुमान याना स्वयेबलय् छगूकथं गजब हे जुइक न्ह्यइपुइ माः धै थें महसुस जू ।
