नेवा: नख: न्यूयोर्कया ग्वसालय् च्याक्वःगु इहि मुना ज्याझ्वः न्यूयोर्कय् क्वचाःगु दु । इहि ज्याझ्वः नेपाल सम्वत ११४३ तछलागा: सप्तमि, सनिबारकुन्हु जूगु खः। नेवा: गुभाजु समन्त बज्राचार्यं नेवा: विधिपूर्वक इहि न्ह्याकादीगु खः। वय्कःयात गुरूमां पुष्पा बज्राचार्य, नेवा: नख:या नायः महेन्द्र बीर बज्राचार्य व निर्वतमान नायः नापं सल्लाहकार विष्णु मान प्रधानं जयमां जुयाः पुजा क्वचायेकेत ग्वाहालि यानादीगु खः ।
न्यूयोर्कया ज्याक्सनहाइटय् च्वंगु शेर्पा किदुगंयागु भवनय् जूगु इहि मुना ज्याझ्वलय् ४ गू स्टेट- न्यूयोर्क, फिलाडेल्फिया, कोलराडो व मिनसोटापाखें यानाः मुक्कं ६ म्ह मिसा मस्त दुथ्याःगु खः। इहि याःपिं मस्त- लसता बज्राचार्य, हेभेन महर्जन, रूवी मे महर्जन अवाले, शनाया डंगोल, आर्या रंजितकार व आर्जा नानी बज्राचार्य नापं ज्याझ्वलय् मस्तय् मांबौ व थ:थिति यानाः सच्छिं मल्याक मनूत मुंगु खः।
नख:या मू छ्यान्जे तुलसी नारायण चित्रकारं सकल पाहां व ब्वति कया दीपिन्त लसकुस यानाः न्ह्याःगु ज्याझ्वलय् नख:या न्हापांम्ह न्वकू डा. नरेश मान शाक्यं इहि ज्याझ्वलय् ब्वति कया दीपिं मस्त, मांअबु, पाहां नापं ज्यासनामिपिनिगु म्हसीका बिसें इहिया महत्त्वय् ब: बियादीगु खःसा नख:या संस्थापक न्वकू, निर्वतमान नायः व सल्लाहकार बिष्णु मान प्रधानं नेवा: नख:-चख:, तजिलजि, हनाकना, कला-संस्कृतियागु संरक्षण व प्रवर्द्धन यायेत सन् २०११ य् न्यूयोर्कय् थुगु संस्था नीस्वंगु खँ कनादिल। संस्थां समुदाय भिंकेगुया निंतिं थी थी ज्याझ्वःत न्ह्याका वयाच्वंगु धासें मेमेगु संघ, संस्थातय्त नं ग्वाहालि याना वयाच्वंगु खँ कनादिल ।
नखःया दांभरिं सलोनी वन्त श्रेष्ठ, ल्यू-दांभरिं मेनी श्रेष्ठ छ्वचुं व दुजः नम्रता प्रधानं ब्वति कया दीपिनिगु नां च्वयेगु भाला कयादीगु खः। ज्याझ्वलय् पाहांकथं नेवाः गुथिया संस्थापक नायः आदित्य महर्जनं ज्याझ्वः सुथां लायेमा धका: भिंतुना द्यछाया दीगु खः ।
ज्याझ्वलय् ब्वति कायेत फिलाडेल्फियानिसें झाःम्ह गैर नेपाःमि पाहां ग्रेगोरिं थजाःगु ज्याझ्वलय् ब्वति काये दयाः यक्व लय्ताः वःगु धासें सुभाय् द्यछाना दीगु खः। ज्याझ्वलय् नख:या नायः महेन्द्र बीर बज्राचार्य, निर्वतमान नायः नापं सल्लाहाकार विष्णु मान प्रधान, न्हापांम्ह न्वकू डा. नरेश मान शाक्य, मू छ्यान्जे तुलसी नारायण चित्रकार, दांभरिं मय्जु सलोनी वन्त श्रेष्ठ व छ्यान्जे अनित श्रेष्ठं इहि याःपिं मस्तय्त हना-पौ लःल्हानाः भिंतुना व सुभाय् द्यछाना दीगु खः ।
अथे हे नायः महेन्द्र बीर बज्राचार्यं ज्याझ्वलय् ब्वति कयादीपिं सकल मस्त, मांअबु, गुभाजु, गुरुमां, पाहां, नखःया दक्व दुजः व ग्वाहालिमिपिन्त सुभाय् प्वंकाः इहि याःपि मस्तय्त बांलाःगु भविष्यया मनंतुनाः सुभाय् द्यछाना दीगु खः । वय्कलं अमेरिकाय् च्वनाः नं थजाःगु महत्वपूर्ण तजिलजि संस्थागत रूपय् न्ह्याके दयाः गौरवान्वित जूगु खँ प्वंकुसे अमेरिकाय् जन्मे जूपिं झी मस्तय्त नेवाः तजिलजि, नख:चख:, भाय् स्यना यंके माःगु खँय् ब: बियादीगु खः।
नखःया लिपाम्ह न्वकू श्रुति अमात्ययागु ग्वसालय् दांभरिं सलोनी वन्त श्रेष्ठ, ल्यू दांभरिं मेनी श्रेष्ठ छ्वचुं, दुजःपिं शोभना शाक्य, नम्रता प्रधान, अनिता बज्राचार्य, लघु शाक्य, मोहिनी कर्माचार्य, उजिला प्रधान, मैना बज्राचार्य, लक्ष्मी शोभा चित्रकार, निलिमा शाक्य, सरिता श्रेष्ठ, उमा माथेमा व निगिता थापा श्रेष्ठं इहिया पुजा सामाग्री ताःलाकेगु नापं इहि याःपिं मस्तय्त मूध्वाखा निसें लसकुस यानाः इहि यायेगु थासय् दुत हयादीगु खः। नापं वय्कपिन्सं सगं व उपहार बिसें इहि यायेत माःगु “थाय्भु” नं ताःलाका दीगु खः ।
संस्थाया मूछ्यान्जे तुलसी नारायण चित्रकार, छ्यान्जे अनित श्रेष्ठ, दुजःपिं किरण रन्जित, अभिषेक छ्वचुं, नविन शाक्य, पुष्प श्रेष्ठ, मुनिन्द्र बज्राचार्य, जेनिश कर्माचार्य, तुलसा चित्रकार, रोहण चित्रकार, ह्यारिसन बज्राचार्य, सिद्धार्थ बज्राचार्य व सुमित श्रेष्ठपिन्सं पाहांपिन्त सत्कार यानाः समय्बजि नसाज्वलंया भाला कयादीगु खः।
न्यूयोर्कय् नेवा: तजिलजिकथं न्यायेकूगु इहि ज्याझ्वलं मांअबु व मस्तय्त ग्वहालि जुइगु व थजाःगु ज्याझ्वलं देसं पिने च्वनाः नं नेवा:तय्गु तजिलजि, हनाकना म्वाका तयेत यक्व तिब: दै धयागु भलसा कासें नेवा: नख: न्यूयोर्कया निर्वतमान नायः नापं सल्लाहकार बिष्णु मान प्रधानं कनादिल ।
