येँ – येँया रत्न राज्य लक्ष्मी क्याम्पस नेपालभाषा ब्वनामिपिन्सं छगू न्हूगु कथं गुरूपुन्हि हंगु दु । अज्ञानरुपी अन्धकारयात चीकाः ज्ञानया जः ह्वलाः शिष्यपिनिगु जीवनयात ताःलाकेत ज्वः मदुगु योगदान बियादीपिं गुरुपिनिगु गुनानुस्मरण यासें रत्न राज्यलक्ष्मी क्याम्पसय् नेपालभाषा बि.ए. व एम. ए. या ब्वनामिपिन्सं क्याम्पसया सभाहलय् गुरु हनाज्याझ्वः याःगु खः।
गुरु हना ज्याझ्वलय् नेपालभाषा अभियान्तालिसें नेवाः विद्यार्थी युनियनया छयाञ्जे प्रशान्त डंगोलं गुरू व शिष्यपिनिगु क्वातुगु सम्बन्ध दयेकेत वि.सं. २०७४ सालनिसें मदिक्क गुरुपुन्हि हनाः वयाच्वंगु न्ह्यथंसे नेपालभाषा ब्वनाच्वंपिं ब्वनामिपिन्त सफू ज्वलं म्ह्व जुइगु लिसें थी थी पंगः चीकेमाःगु खँय् बः बिसें सकल गुरूवरपिन्त गुरुपुन्हिया लसताय् भिंतुना द्यछाया दिल ।
युनियनया ल्यूछयाञ्जे इन्द्रमान महर्जनं न्ह्याकादीगु ज्याझ्वलय् क्याम्पसया प्रमुख जीवनधर ज्ञवाली, सहायक प्रमुख रबिनदास श्रेष्ठ, नेपालभाषा स्यनामिपिं मदनसेन बज्राचार्य, प्रा.डा. चन्द्रमान बज्राचार्य, दिपना शर्मा, श्रीमिला सुवाल, सुनिता राजभण्डारी ‘जुनु’, अनुपसिंह सुवाल व योगेन्द्र राजकर्णिकारपिन्त मंकाःकथं नेपालभाषा ब्वनामिपिन्सं गुरूपुन्हिया लसताय् हंगु खः ।
ज्याझ्वलय् गुरूवर्गपिन्सं नुगःखँ प्वंकुसें गुरु–शिष्यया महत्व परापूर्वकालंनिसें दुगु धकाः थःथःपिनि धापू प्वंकादीगु खः । ज्याझ्वलय् जनगायक चन्द्रबहादुर ‘माइला दाइ’नं भजन मेलिसें युनियनया दुजः सुमितदास रञ्जितकार व एम.ए. नेपालभाषा ब्वनामि रुपा शाहिं गुरुपुन्हिया लसताय् गुरु हनाज्याझ्वःया महिमालिसें स्वापू दुगु चिनाखँ वाचन यानादीगु खः।
ज्याझ्वःया सभापति रिदेन महर्जनं आःया अभियान धयागु नेवाः विश्वविद्यालय पलिस्था यायेगु जूगु अले मेयर बालेन शाह व उपमेयर सुनिता डंगोलपिंन्सं नेवाः विश्वविद्यालय पलिस्था यायेत ग्वाहालिलिसें प्रतिबद्वता बियादीगुलिं उगु अभियानय् सकलसिनं ग्वाहालि यायेत इनाप यानादीगु खःसा रत्न राज्यलक्ष्मी क्याम्पसय् नेपालभाषा ब्वनादीम्ह अनिल महर्जनया दाजु ४३ दँया बिकास महर्जन क्यान्सर ल्वचं कयाच्वंगुलिं वय्कःया वासः यायेगु निंतिं ११,००० व जनगायक चन्द्र बहादुर श्रेष्ठ ‘माइला दाइ’या जहानया वासः यायेगु निंतिं ५,००० तका दां ग्वाहालि यानादीगुली स्यनामि श्रीमिला सुवाल, २५ दँनिसें फोटोग्राफर ज्याय् सक्रिय जुया च्वनादीम्ह अनिल रन्जितयात विशेष सुभाय् द्यछासें वइगु न्हिइ फयांफच्छि ग्वाहालि यायेगु धापू तसें ज्याझ्वः क्यचायेका दीगु खः ।
ज्याझ्वलय् युनियनया संस्थापक नायः रिदेन महर्जनपाखें न्यासः व युनियनया संस्थापक दुजः मनिषकुमार श्रेष्ठपाखें न्यासः तका दां क्यान्सरपिडितयात लःल्हानादीगु खः ।
