येँ – येँ महानगर पालिकाया शिक्षा विभागया ग्वसाः व नेवाः स्यनामि दबूया प्राविधिक ग्वाहाली सामुदायिक ब्वनेकुथिया स्यनामि (नेपालभाषा प्रशिक्षण सहायक)पिन्त पुनर्ताजगी तालिम ब्यूगु दु। ने.सं. ११४३ दिल्लागाः दुतिया, बुधबारनिसें दिल्लागाः सप्तमि, आइतबारतक न्ह्याःगु पुनर्ताजगी तालिमय् १७२ म्ह नेपालभाषा प्रशिक्षण सहायकपिन्सं ब्वति काःगु खः।
म्हिगः आइतबाः समापन ज्याझ्वः यानाः तालिम काःपिं स्यनामिपिन्त येँ महानगर पालिकाया उपप्रमुख सुनिता डंगोलं दसिपौ नं लःल्हानादीगु खः ।
ज्याझ्वलय् उपप्रमुख डंगोलं पुनर्ताजगि तालिमयात कयाः खँ कुलादीसें थुगु ख्यलय् थःपिन्सं माःगु ग्वाहालि यानावं च्वनेगु धकाः बचं नं बियादीगु खः ।
ज्याझ्वलय् नेवाः स्यनामि दबूया कजिलिसें मू प्रशिक्षक बरुण प्रसाद वैद्यं तालिमया थी थी खँयात न्ह्यब्वयाः थुकिया महत्व व झीसं यानावने माःगु खँयात ब्वयादीगु खः ।
अथेहे १७२ म्ह स्यनामिपाखें थुगु तालिमया महत्व व अनुभवयात कयाः नीतु डंगोलं थःगु नुगःखँ तयादीगु खः ।
न्यान्हुयंक न्ह्याःगु पुनर्ताजगी तालिमय् मूखतं नेवाःभाय् गुकथं सुद्धं च्वयेगु धयागु खँय् ब्यवहारिककथं स्यनेकने ज्या जूगु खः । तालिमया मू प्रशिक्षककथं बरुण प्रसाद वैद्य व प्रशिक्षककथं डा. बज्रमुनि बज्राचार्य, पौभाः साय्मि, अनिल स्थापित, शरद कसाः, आनन्दमुनि बज्राचार्य, रबिन श्रेष्ठ, जीवन कुमार महर्जन, सुरेश किरण मानन्धर, गुजेश्वरी श्रेष्ठपिं दुथ्याना दीगु खः ।
येँ महानगर दुनेया ब्वनेकुथी नेपालभाषा विषय अनिवार्यकथं ब्वंकेज्या जुइधुंकाः नेवाः स्यनामि दबूपाखें इलय् ब्यलय् थुकथंया तालिमया संयोजन याना: वयाच्वंगु दु।
