यें – नेपालभाषा साहित्य ख्यलय् ख्याल विधायात स्थापित याःगु संस्था मुनासं थःगु ५० दँय् क्यंगु लसता लुँबुदिया ज्याझ्वः याःगु दु । मुनासःया नायः श्रीराम श्रेष्ठया सभाध्यक्षताय् कीपूलिइ सोमबार जूगु ज्याझ्वःया यल महानगरपालिकाया प्रमुख चिरिबाबु महर्जन, येँ महानगरपालिका उपप्रमुख सुनिता डंगोल व कीपू नगरपालिकाया कार्यवाहक प्रमुख सुनिता शाक्यं मंकाः कथं उलेज्या यानादीगु खः ।
ज्याझ्वलय् जनगायक भृगुराम श्रेष्ठ, जनकवि दुर्गालाल श्रेष्ठ व साहित्यकार पुष्प चित्रकारयात विशेष सम्मान याःगु खः । मुनासःया संस्थापक अध्यक्षलिसें न्वकू नविन चित्रकारं वय्कपिन्त झ्याः दुने गं घानातःगु मतिनाया चिं लःल्हानादीगु खः ।
ज्याझ्वलय् मुनासःया नायः श्रीराम श्रेष्ठ, छ्यांज्येलिसें ख्यालि जुजु मदनकृष्ण श्रेष्ठ, वरिष्ठ हांस्य कलाकार हरिवंश आचार्य व प्रकाश साय्मिं मुनासःया योगदानयात कया च्वछायादीगु खः ।
ज्याझ्वलय् दैत्य वध महाकाली प्याखं, मुनासःया म्हसीका म्येलिसें थीथी कलाकारपिनिगु सांगीतिक ब्वज्या, ख्यालिजुजु मदनकृष्ण श्रेष्ठया ख्यालिन्हिलि ब्वज्यालिसें मदुम्ह श्रीकृष्ण अणुं निर्देशनय् न्हापा मुनासःया ग्वसालय् जूगु ख्यालः कासाय् न्हाप लाःगु ‘खलाः मखुला ?’ ख्यालः प्रस्तुत याःगु खः । अथेहे ज्याझ्वलय् कवि केशरी चित्तधर हृदयया जीवनकालय् दयेकूगु वय्कयाः वृत्तचित्र क्यंगु खः ।
ज्याझ्वलय् मुनासलं खुक्वः तक याःगु ख्यालः धेधेंबल्लाः कासाय् ब्वति काःपिं च्वमि, निर्देशक व कलाकारपिंत लुमन्ति चिं नं लःल्हाःगु खः साः निर्देशक सुरेन्द्र तुलाधरया नेतृत्वय् न्हूगु ज्यासना पुचयात मुनासः संचालन यायेगु भाला नं लःल्हागु खः।
