यें – नेपालभाषाया म्ये “म्हगसय् वया:”या भिडियोया पितब्वज्या जूगु दु। म्येहालामिलिसें इन्जिनियर भुपेन्द्रमान शाक्यया नायःसुइ मंगलबार येँया लुँहितिया सिटिसि मलय् जूगु ज्याझ्वलय् इन्जिनियर बाल सुन्दर मल्लं म्यूजिक भिडियोया पितब्वज्या यानादीगु खः।
दर्शन वीर शाक्यया च्वसा, संगीतकार सुरेन्द्र श्रेष्ठं एरेन्ज यानादीगु थ्व म्येय् रत्नशोभा महर्जनं आलाप तयादीगु दु । म्यूजिक भिडियोलय् म्येहालामि भुपेन्द्रमानलिसें वय्कःया तिरि मय्जु अन्नपूर्ण तुलाधर शाक्य, अमोघवीर बज्राचार्य, सुमि मानन्धर उजय शाही, मचा कलाकर संकिपा श्रेष्ठं म्हितादीगु दु।
अन्नपूर्ण तुलाधरं निर्माण यानादीगु थुगु म्यूजिक भिडियोया निर्देशन विश्वास बज्राचार्यं, सिनेमाटोग्राफी/एडिट/कलर आकृष्ट शाक्य, समा: श्वेता शाक्य, भिएफएक्स विजनराज बज्राचार्य, कोरियोग्राफी रोहिया महर्जनं यानादीगु दु । म्यूजिक भिडियोया प्रोजेक्ट म्यानेजर उजय शाही जुयादी।
म्यूजिक भिडियोलय् थःगु ज्याया कारणं जीवनय् यायेमाःगु संघर्ष, छेँज:पिं नापं बाया: च्वनेमाःगु, जीवन पासाया मतिना व हपालं जुइगु सफलतायात कयाः म्येहालामिया यथार्थ बाखं न्ह्यब्वया तःगु दु।
