येँ, नेवाः पत्रकारतय् राष्ट्रिय संगठन– नेवाः पत्रकार राष्ट्रिय दबुलिं थ्व हे वइगु बछलागाः नःमि, सनिबार व बछलागाः दसमि, आइतबार (जेठ १९ व २० गते) निन्हुयंक अन्तर्राष्ट्रिय मातृभाषा पत्रकारिता सम्मेलनया ग्वसाः ग्वःगु दु । नेपालय् मातृभाषा पत्रकारिता सुरु जूगु १०० दँ क्यंगुया लसताय् मातृभाषा पत्रकारिता शताब्दी दँ हनेत थुगु सम्मेलनया यायेत्यंगु खः ।
नेपाःया थी थी भाय्या पत्रकारया लिसें भारत, बङ्गलादेश, पाकिस्तान, जापान, श्रीलङ्काया लिसें देय्या पत्रकारतसें ब्वति काइगु थुगु सम्मेलनय् भर्चुअल माध्यमं तकं ब्वति काइगु धकाः पत्रकार सम्मेलनय् जानकारी ब्यूगु दु । वइगु बछलागाः नःमि, सनिबारखुन्हु स्टाफ कलेज, यलय् पुलांम्ह राष्ट्रपति विद्यादेवी भण्डारिं उजेज्या यानादीगु थुगु सम्मेलनय् थी थी वियसस केन्दित प्यानलय् सहलह जुइसा निन्हुखुन्हु उपप्रधान व परराष्ट्रमन्त्री नारायण काजी श्रेष्ठया उपस्थितिइ समापन ज्याझ्वः जुइ ।
१०० दँ न्ह्यः नेपालभाषाया पत्रिका ‘बुद्धधर्म व नेपालभाषा’ सम्पादन यानाः पिथना दीम्ह न्हापांम्ह मातृभाषा पत्रकार धर्मादित्य धर्माचार्यया १२२ क्वःगु बुन्हि व ९ क्वःगु मातृभाषा पत्रकारिता दिवस अले नेपालय् न्हापांखुसी मांभाय् नेपालभाषां पिदंगु ‘बुद्धधर्म व नेपालभाषा’ पिदंगु १०० दँ दुगु लसताय् सम्मेलनया लिसें दँयंक थी थी ज्याझ्वः जुइगु धकाः नं ग्वसाः खलकं धाःगु दु । सम्मेलनया निंतिं सार्क जर्नालिष्ट फोरमं थी थी देय्या प्रतिनिधि पत्रकारतय्गु संयोजनय् ग्वाहालि याःगु दुसा नेपाल आदिवासी जनजाति पत्रकार महासंघं देय् दुनेया थी थी मातृभाषी पत्रकारतय् सहभागिताया निंतिं संयोजन यानाः ग्वाहालि याःगु दु ।
