खय् भाय्या नापनापं नेपालभाषा साहित्य ख्यलय् ज्वःमदुगु योगदान यानादीम्ह कविरत्न सिद्धिचरण श्रेष्ठया ११३ क्वःगु बुन्हि हलिं नेवाः दबू नं हंगु दु। बुन्हि हनेज्या जूमपाखें तछलाथ्व पञ्चमी, वंगु मंगलबार जूगु खः ।
हलिं नेवाः दबूया केन्द्रीय नायः संयुक्त श्रेष्ठंं सिद्धिचरणया किपाया न्ह्यःने न्हूप्रविधि कथं मत च्याकाः उलेज्या यासें ज्याझ्वलय् ब्वति कयादीपिन्त लसकुस यानादीगु खः।
ज्याझ्वःया मूवक्ता प्रा. पे्रमशान्ति तुलाधरंं सिद्धिचरणं नेपालभाषा साहित्यय् यानादीगु योगदान बिषयस ज्यापौ न्ह्यब्वसें सिद्धिचरणं खयभाय्या नापनापं नेपालभाषा साहित्यय् तःजिगु योगदान यानादीगु धयादिल। तुलाधरं सिद्धिचरण नेपालय् स्वछन्दवाद साहित्यया प्रवर्तक खः धयादिल ।
सिद्धिचरणया काय् समाजसेवी रविचरण श्रेष्ठंं सिद्धिचरणंं नेपालय् दकले न्हापां क्रान्ति, हडताल, घःमाः खँग्वः प्रयोग यानादीगु खँ न्ह्यथसे वय्कया कविताया प्रेरणा कयाः गंगालाल श्रेष्ठ शहीद तक जुयादीगु प्रसंग न्ह्यथनादिल ।
ज्याझ्वलय् कवि कवियत्रीपिं भगतदास श्रेष्ठ, प्रतिसरा साय्मि, नारद वज्राचार्य, रश्मी नापित व लोककवि राजभाइ जकःमिपिन्सं सिद्धिचरणया वारे व सिद्धिचरणं च्वयातःगु चिनाखँ ब्वनादीगु खःसाः संगीतकःमि रिता महर्जनंं सिद्धिचरण च्वयादीगु ‘जिगु देय् छ जितः गुलि यः गुलि यः’ नांगु म्ये हालादीगु खः ।
ज्याझ्वलय् दबूया मूदुजः विरेन्द्र नकःमिंं सुभाय् न्वचु बियादीगु खसाः दबूया मूदुजः नापं डब्ल्यू. डि. बि.या कजि डा. नरेश शाक्यंं ज्याझ्वः न्ह्याकादीगु खः ।
