श्रीघलय् च्वंगु धर्मकीर्ति विहारं गृही विनय (गृहस्थ जीवन) सम्बन्धि प्रशिक्षण काःपिं उपासक उपासिकापिन्त दसिपौ लःल्हाःगु दु ।
दच्छियंक न्ह्याःगु उगु प्रशिक्षणय् ताःलाःपिन्त प्रधानमन्त्री केपी शर्मा ओलिं दसिपौ लःल्हाना दीगु खः । प्रशिक्षणय् दुथ्याःपिं ६४ म्ह ताःलाःगु खः । उगु लसता ज्याझ्वलय् प्रधान मन्त्री ओलिं आःया हलिंयात न्हापां स्वयां अप्वः शान्ति मालाच्वंगु दु धकाः धयादिल ।
वय्कलं आःया हलिंयात शान्ति, करुणा, मानवता, स्नेह, ममता, दया व परोपकारि भाव तसकं मालाच्वंगुलिं बुद्धया शिक्षा झन अप्वः समसामयिक जूगु धकाः धयादीगु खः । खराब उम्माद, आक्रोश व दम्भया लँपु त्वःताः शालिनता, विनयशीलता, मानवीयता व आत्मीयभाव क्यनेफुसा हलिमय् शान्ति जुइगु व पृथ्वीया नं रक्षा यायेफैगु धयागु प्रधानमन्त्री ओलीया धापू खः ।
ज्याझ्वलय् विहारया प्रमुख धम्मावती गुरुमामं प्रधानमन्त्री ओलीयात आरोग्यया लिसें नेपाःयात बांलाःगु लँपुइ यंके फयेमा धकाः मन्तुना प्वंका दिल । ज्याझ्वलय् प्रधानमन्त्री ओलीया तिरि राधिका शाक्य व येँ महानगर पालिकाया उपप्रमुख सुनिता डंगोललिसेंया मनूत झायादीगु खः ।
