यलया बुंगद्यःया रथजात्रा छुं न्हिया निंतिं द्यूगु दु । रथ सालेगु झ्वलय् तसकं धेचूगुलिं यलया गुठी संस्थानं छुं न्हिया निंतिं रथजात्रा दिकाः रथयात ल्ह्वनेज्या यायेगु धकाः धाःगु दु । म्हिगः रथ ओकुबहालं लगंख्यःतक सालेगु झ्वलय् रथ तसकं धेचू वंगुलिं रथयात थपाहितितक जक सालेफुगु खः ।
रथजात्राया न्हापांगु न्हि रथयात पूच्वं सालेगु झ्वलय् नःत्वालय् बिजुलिया खम्बाय् न्यायेवं रथ धेचुइगु सुरु जूगु खः । यल महानगर पालिका, गुठी संस्थान, बाराही, यंवा लिसेंया रथ जात्राया गुथ्याःतसें रथया निरीक्षण यायेत्यंगु दु । रथया निरीक्षण धुंकाः जक रथ ल्ह्वनेज्याया निंतिं ग्वःन्हु माली धकाः धायेफैगु खँ रथ दयेकेगु ज्याय् जानादीम्ह दिलकुमार बाराहिं कनादिल ।
वंगु सनिबार पूच्वं रथ सालाः आःतक रथयात गाःबहाः, महापाः, मंगः, लुँहिति, ओकुबहाः जुकाः थपाहितितक थ्यंकेधुंकूगु दु । आः बुंगद्यःया रथजात्रा थपाहितिं लगंख्यः, इतित्वाः, जाह्वलाख्यःतक थ्यंके ल्यं दनि । रथयात जाह्वलाख्यलय् थ्यंकाः पुतुलं /भोटो क्यने सिधयेवं जात्रा क्वचाइ । १२ दँतक वा मवयाः अनिकाल जुइवं ख्वपया अबलय्या जुजु नरेन्द्रदेव, येँया तान्त्रिक बन्धुदत्त आचार्य व यलया ललित ज्यापु / रथचक्रं बुंगद्यःयात भारतया कामारुकामाक्षं थन हयेधुंकाः सहकाल सुरु जूगु धकाः धया वयाच्वंगु दु ।
