किपुली दँय् दसं भाद्र १ गते जुइगु बाघभैरव आःजु द्यःया जात्रा हलिंन्यंकं प्रचारप्रसार यायेगु ताःतुना व किपूया म्हसीका बिइगु आज्जुं संचारकःमि ललेन्द्र शाक्यया च्वसा व लसं पिज्वःगु नेपालभाषा ज्वःम्ये “आःजु द्यःया गं” लोकदोहोरी किपूया कीर्तिपुर सिनेप्लेक्स हलय् छगू ज्याझ्वःया दथुइ पिदंगु दु ।
थुगु म्येय् स्वयं म्येच्वमि व लय् चिनामि ललेन्द्र शाक्य व नांजाःम्ह म्येहालामि रत्नशोभा महर्जनं सः बियादीगु दु ।
नांजाःम्ह संगीतकःमि हरिशरण सायमिया संगीत संयोजनय् पिदंगु थुगु म्ये किपू नगरपालिका व किपू नगरपालिकाया १ निसें १० वडाया सहकार्यस किपूया १ वडा बाघभैरव लागाय् च्वंगु गुँदे दापा खलःया लुखां पिदंगु खः ।
थुगु म्यूजिक भिडियो ज्योति म्यूजिक यूट्युब च्यानलं पिदंगु दुसा म्यूजिक भिडियोया निर्देशन विश्वास बज्राचार्यं यानादीगु दु ।
अथेहे, कोरियोग्राफी रोहिया महर्जनं यानादीगु दुसा सोहन मानन्धरं किपालुमिया भाला कुबियादीगु दु ।
म्यूजिक भिडियो दुने पब्लिक स्टार मनोज महर्जन व न्हूप्रतिभा कलाकार नशला महर्जनया मू भूमिका दुसा रामप्रसाद महर्जन, चिरिबाबु महर्जन, स्टेला महर्जन, सुरभ महर्जन, नेरोन महर्जन व प्राश्ना तण्डुकारया भूमिका नं दुथ्यानाच्वंगु दु । थुगु “आःजु द्यःया गं” म्येय् नांजाःपिं म्येहालामिपिं दीपा महर्जन, रानीशोभा महर्जनलिसें उदय मानन्धर व जवान मालीं पुचः सलय् साथ बियातःगु दु । किपू नगरपालिकाया नगर प्रमुख कृष्णमान डंगोलया मूपाहाँसुइ थुगु “आःजु द्यःया गं” म्यूजिक भिडियो पितब्वज्या जूगु ज्याझ्वः गुँदे दापा खलःया नायः अशोक महर्जनया सभापतित्वय् न्ह्याःगु खः ।
ज्याझ्वःया सभापति अशोक महर्जनं लसकुस न्वचू तयादीगु उगु ज्याझ्वलय् किपू नगरपालिका १ वडाया वडाध्यक्ष इच्छा कुमार महर्जन, म्येया सर्जक ललेन्द्र शाक्य, म्येया संगीत संयोजक हरिशरण सायमि व निर्देशक विश्वास बज्राचार्यं थःगु नुगःखँ तयादीगु खः । अथेहे, ज्याझ्वलय् लोककवि राजभाई जकःमिं पिदंगु “आःजु द्यःया गं”या म्ये व संगीतया विषयस समीक्षा यानादीगु खःसा म्यूजिक भिडियोया समीक्षा बरिष्ठ सिनेपत्रकार विजयरत्न असंबरें यानादीगु खः ।
किपू नगरया १ निसें १० वडाया वडाध्यक्षपिं पाहाँ कथं उपस्थित जुयादीगु उगु ज्याझ्वः संचारकःमिलिसें संगीतकःमि रिता महर्जनं न्ह्याकादीगु खःसा म्यूजिक भिडियो क्यनेज्या लिपा मूपाहाँ किपू नगरपालिकाया नगर प्रमुख कृष्णमान डंगोलया नुगःखँपाखें क्वचाःगु खः ।
