यल – यल महानगर पालिका १६ वडाया ग्वसालय् गोर्जियस इन्स्टिच्यूट अफ फेशन टेक्नोलजि गिफ्टपाखें ब्यूगु डिजाइनिङ्ग, सिलाइ तालिम क्वचाःगु दु । ४५ न्हुतक जूगु तालिमया समापन ज्याझ्वः मंगलबार गिफ्टया ज्याकुथिइ याःगु खः ।
समापन ज्याझ्वलय् १६ वडाया वडा अध्यक्ष निर्मल रत्न शाक्यं तालिमपाखें सिप सयेकाः उत्पादन याःगु वसःया बजार व्यबस्थापनय् नं वडापाखें ग्वाहालि याये धकाः धासे मिसा उद्यमीया संख्यात्मक वृद्दि याना यंकेत इलय्ब्यलय् मेलाया ग्वसाः ग्वयेगु लक्ष्य दु धकाः धयादिल ।
वडा दुजःया लिसें वडाया महिला समिति कजि बविता श्रेष्ठं मिसा उद्यमीतसें आयआर्जनया सोचयात नाला कायेमाः धासे स्थानीय सरकारपाखें ग्वसाः ग्वःगु थज्याःगु थी थी कथंया तालिमयात लगानीकथं कयाः न्ह्याः वनेमाः धकाः धयादिल ।
समापन ज्याझ्वलय् गिफ्टया शोभा महर्जनं मिस्त छेँया तिसा जक जुया च्वनेगु मखसे आत्मनिर्भर जुयाः उद्यमशील नं जुया च्वनेमाः धकाः धासे स्थानिय तहपाखें ग्वसाः ग्वःगु तालिमं मिस्तय्गु शिप विकास व आत्मनिर्भर जुइत ग्वाहालि जुइ धकाः धयादिल ।
ज्याझ्वलय् नांजाःम्ह संकिपामि सुरेन्द्र तुलाधर, वरिष्ठ सिने पत्रकार विजयरत्न असंबरे, तालिम काःपिंपाखें प्रतिमा बज्राचार्य, रोहिणी कर्माचार्य, बिन्दिरा महर्जन, मीना शाक्य, कुन्जना बज्राचार्यपिन्सं नुगःखँ तयादीगु खः ।
