नेवाः अर्गनाइजेशन अफ अमेरिका (एनओए) या २२ दँमुंज्यालिसें राष्ट्रिय सम्मेलन जूगु दु । एनओएया नायः यज्ञमान शाक्यया नायःसुइ सम्मेलन अमेरिकाया वासिङ्गटन डिसिइ मे २७ तारिखय् जूगु खः।
ज्याझ्वलय् मू वक्ताया रूपय् न्ववासें वर्ल्ड नेवाः अर्गनाइजेशन अमेरिकाया वरिष्ठ न्वकूलिसें साहित्यकार केशरमान ताम्राकारं नेपालभाषा, कला, संस्कृति, साहित्य लगायतया प्रचारप्रसारय् संचार माध्यमया भूमिका विषयलय् थःगु न्वचु तयादीगु खःसा वय्कःयात अनररी लाइफ मेम्बर प्रदान याःगु खः ।
अथे हे ज्याझ्वलय् वर्ल्ड नेवाः अर्गनाइजेशनया निवर्तमान नायः सिजन श्रेष्ठं नेपालभाषा, कला, संस्कृतिया महत्वया खँय् न्ववासें थुकिया संरक्षणया निंतिं बः बियादिल।
सम्मेलनं स्वदँया कार्यकालया निंतिं महिन्द्रमान सिंह प्रधानया नायःसुइ एनओएया न्हूगु नेतृत्व नं ल्यःगु दु । न्हापांम्ह न्वकुइ राजेशलाल श्रेष्ठ, निम्हम्ह न्वकुइ दिवाकर धौभडेल, मूछ्यान्जेय् बबिता श्रेष्ठ, छ्यान्जेय् नवीन मोहन रञ्जित, दांभरिंस मार्कण्डेयमान सिंह प्रधान निर्वाचित जुयादीगु खः ।
अथे हे ज्यासना पुचःया दुजलय् सुगन्धा श्रेष्ठ, रमा महर्जन शाक्य व रमिता श्रेष्ठ निर्वाचित जुयादीगु दुसा जनसम्पर्क व सहयोग संयोजकय् मिला श्रेष्ठ, मिडिया तथा फिलान्थ्रोपिक संयोजकय् अनिल रञ्जित व पब्लिक आउटरिच संयोजकय् राजेश तुलाधर निर्वाचित जुयादीगु दु।
एनओएया नीस्वना दुजः दयारत्न शाक्यया नायःसुइ गठन जूगु ३ दुजःया निर्वाचन समितिइ न्हूगु कार्यसमितिया लिच्वः घोषणा याःगु खः । समितिया दुजलय् नीस्वना दुजः रत्नकाजी शाक्य व पुलांम्ह नायः रामलाल श्रेष्ठ च्वनादीगु खः।
