हलिं नेवाः दबू (वर्ल्ड नेवाः अर्गनाइजेशन, डब्ल्यूएनओ)पाखें ‘निक्वःगु हलिं नेवाः न्ह्यसः लिसः कासा ११४३’ याइगु जूगु दु। न्ह्यसः लिसः कासा वइगु ने.सं. ११४३ गुंलाथ्वः तृतिया, सनिबार (अगस्ट १९ / भदौ २)निसें सुरु जुइगु खँ डब्ल्यूएनओं धाःगु दु ।
प्रविधिया माध्यमं जुइगु कासाय् ब्वति कायेत नेपाःलिसें विश्वया हरेक देसय् च्वंपिं झिंनिगू तगिं तकया ब्वमिपिन्सं वइगु ने.सं. ११४३ अनलागा: एकादसि, सनिबार ( अगस्ट १२)दुने क्वःछिना तःगु ल्हापं पुलाः फाराम दुतिनाः ब्वति कायेफइगु धकाः डब्ल्यूएनओं धाःगु दु। ब्वति कायेगु निंतिं नेपाः दुनेया छगू पुचःया निंतिं ने.रू. १,०००/- (द्वःछि तका) व नेपालं पिनेच्वंगु छगू पुचःया निंतिं २५ अमेरिकी डलर ल्हापं क्वःछिना तःगु दु ।
डब्ल्यूएनओया कथं न्ह्यसः लिसः कासाय् मुक्कं सुइनिगू पुचः जक दुथ्याकाः, समूह विभाजन यानाः छगू समूहय् प्यंगू पुचः दुथ्याकाः कासा जुइ । न्हापांगु चरणय् उत्कृष्ट निगू पुचः (न्हाप व ल्यू) निगूगु चरणय् वनीसा निगूगु चरणय् उत्कृष्ट छगू पुचः स्वंगूगु चरणय् दुहां वनी। उकी नं उत्कृष्ट जुइत ताःलाःगु पुचः बिजं कासाय् (फाइनल) दुहां वनीगु व दकलय् लिपा प्यंगू पुचःया दथुइ जुइगु बिजं कासाय् न्हापं, ल्यू, लियां ल्यू, हःपाः सिरपाः त्याकेत ताःलाःपिन्त नगद सिरपाः बी । बिजं कासाय् न्हापयात १,००० अमेरिकी डलर, ल्यूयात ८०० अमेरिकी डलर, लियांल्यूयात ६०० अमेरिकी डलर व हःपाःयात ४०० अमेरिकी डलर सिरपाःलिसें कासापतिकं त्याःगु पुच:यात ८० अमेरिकी डलर सिरपाः बीगु धकाः डब्ल्यूएनओं धाःगु दु।
कासाय् ब्वति कायेत डब्ल्यूएनओया वेवसाइट व कासाया नियमत थन क्लिक यानाः स्वयेफइ।
