येँ– येँया म्यूजियम अफ नेपाली आर्ट (मोना)पाखें कला इतिहासकार संयुक्त श्रेष्ठलिसे नेपाःया परम्परागत मूर्तिकलाया आइक्नोग्राफिइ नेपाःया तान्त्रिक बौद्ध धर्मया भूमिका बिषयस अन्तरक्रिया ज्याझ्वःया ग्वसाः ग्वयेत्यंगु दु ।
लेटस् तक आर्ट ज्याझ्वलय् कला इतिहासकार श्रेष्ठलिसे अमोघपासया तान्त्रिक कलाया खँय् येँ, थँबहीया काठमान्डौं गेस्ट हाउसय् च्वंगु मोनाय् अन्तरक्रिया जुइत्यंगु खः । ज्याझ्वः वइगु अनलागाः एकादसि, सनिबार (अगस्ट १२)खुन्हु न्हिनसिया १२ ताः इलय् जुइ ।
अन्तरक्रिया ज्याझ्वलय् अमोघपासयात छगू केस स्टडिया कथं कयाः नेपाःया परम्परागत मूर्तिकलाया आइक्नोग्राफिइ नेपाःया तान्त्रिक बौद्ध धर्मया भूमिकाया खँय् पूवंक सहलह जुइ ।
बेलायतय् च्वनादीम्ह कला इतिहासकार श्रेष्ठ नेपाःया कलाया अध्ययनकर्ता जुयादी । वय्कलं कला इतिहासलिसे स्वाःगु लिङ्क अप संस्थालिसे स्वानाः बेलायतय् कला व इतिहासया अध्यापन याना वया च्वनादीगु दु ।
