पीस्वदँ न्ह्यवंनिसें सांगीतिक ख्यलय् मदिक्क योगदान यानावं वया च्वनादीगु संगीतकःमि गोविन्द ह्यूमतया सांगितिक ज्याझ्वः जूगु दु । गोविन्द ह्यूमत सनिल – ११४३ ज्याझ्वः म्हिगः सोमबारखुन्हु किपू, पांगाया सिनेप्लेक्स हलय् जूगु खः। ज्याझ्वलय् ह्यूमतं १५ पु नेपालभाषाया मे हालाःदिगु खः।
ज्याझ्वलय् येँ महानगर पालिका वडा ल्याः १२ या वडानायः बालकृष्ण महर्जन, हंस स्मृति समाजया नायः डा. रमेश मान सिंह, गोरखापत्र संस्थानया सल्लाहकार सम्पादक व ग्वसाःखलःया पाखें विजयलाल डंगोलं वय्कःयात हनापौ व छगू लख दांया लिसें हनादीगु खः । लिसें, नेवाः साधना कला केन्द्रया नायः बागमति भाइनं नं झिद्वः दां व भिंतुनापौया लिसें पलिगां न्यकेकाः हनादीगु खः ।
नेपाल संबत १०८५ चौलाय् अबु इन्द्रलाल खड्गी व मां द्वारिका देवी खड्गीया कोखं येँया वडा ल्याः १२ ह्यूमत त्वालय् जन्म जुयादीम्ह वय्कलं आःतक ४०० पु मेय् संगीत तया दीधुंकूगु दु। वय्कलं संगीत तयादीगु मे, नेपाः व भारतया नांजाःपिं मेहालामिपिं मोहम्मद अजिज, अनुराधा पौडवाल, कुमार सानुलिसेंया मेहालामिपिनिगु सलय् तकं पिहां वयेधुंकूगु दु।
वय्कलं नेपालभाषाया संकिपात ‘न्हिलाः न्हिलाः हुँ’, ‘चरित्र’, ‘जीवन यात्रा’, ‘उपहार’, ‘बांलाः मय्जु’, ‘घोषक’, ‘अजःमिखा’, ‘पानवति’, ‘सेरिबन्जाः’या मेय् संगीत तयादीगु दु । वय्कलं मांया पाखें सांगीतिक ख्यलय् पलाः न्ह्याकेत हःपाः दुगु खँ ज्याझ्वलय् कनादीगु खः।
